Shillong, Lber, 28: Ka Voice of the People Party (VPP) ha ka sngi Thohdieng ka la sospon na ka bynta lai snem ïa u MLA ka North Shillong Constituency u Bah Adlebert Nongrum halor ka jingkynnoh ba u la ïaleh pyrshah ïa la ka jong ka party.
Nalor u Bah Adelbert saw ngut kiwei pat ki nongïalam kiba la shah sospon ki long u Bah Imti Jamir, Bah Snarbor Laloo, Bah Wilstone Sohshang bad ïa u Bah Richin Business Marwein ym shym la buh por eiei katno snem la sospon.
Ka ka jingsospon ïa kine ki san ngut ka long hadien ba ka party ka la pan jingshai na ki halor ki kam ïaleh pyrshah seng jong ki.
Ka VPP lyngba u nongaiktien Dr. Batskhem Myrboh ka ong ba ka party kam sngewhun satia ïa ka jingjubab jong ki ba lapan na kine ki san ngut.
Ha kine ki lai snem ba ki san ngut ki dang don hapdeng ka jingshah sospon kim lah satia ban bat ïa kino kino ki kam hapoh ka party bad ym shym shah satia ba kin mihkhmat ïa ka party ha kino kino ki lympung ne ki jingïalang bad ki dei ban bud ryntih ïa kine ki jingbthah jong ka party.
Ha ka shithi ba la phah shah u Bah Nongrum, u Vice President ka VPP u Dr Kara H. Shen u ong, “la shem ba ka jubab jong phi, ban ïa kaba pynpaw ïa ka jingsngewsih ne ban pynpaw eiei halor ka jingpan jingpynshai, phi la ïada ïalade, ïaleh pyrshah bad kam don kano kano ka dak jong ka jingsngewsih na ka bynta ki jngleh kiba pynsniew dur ïa ki jingtreikam jong ka Party. Ka rukom jubab jong phi ha ka shithi pan jingpynshai ka pynpaw shuh shuh ïa ka jingbym kohnguh ïa ki aiñ bad ki nongrim treikam jong ka party, ïa kaba ym lah satia ban shu sngap noh kumto.”
“Hadien ka jingïathir sani bha, ka party ka shem ba kam hun satia ïa ka jingjubab bad da kaba pyntreikam ïa ka iktiar ba la pynkupbor hapoh ka Article III, Clause 5 jong ka riti treikam jong ka Voice of the People Party, namarkata, la sospon mardor ïa phi lai snem na ka party,” la bynrap ka shithi.
“Hapdeng kine ki samoi ba la sospon, phim lah satia ban bat ïa kino kino ki kyrdan, ki jingkitkhlieh, ka hok long riewdkhot hapoh ka party. Phim lah shuh ban mihkhmat ha ka kyrteng ka party ha kino kino ki rynsan ne ki jingïalang. La ai jingmut ba phi dei ban kiar na kaba leh ïa kano kano ka kam kaba lah ban pynsniewdur ïa ka party,” ong ka shithi sha u Bah Nongrum.
Ha ka shithi sha ki saw ngut ki dkhot, u Dr. Shen u la ong, “la shem ba ka jubab jong phi, ban ïa kaba pynpaw ïa ka jingsngewsih ne ban pynpaw eiei halor ka jingpan jingpynshai, phi la ïada ïalade, ïaleh pyrshah bad kam ruh ba kam don kano kano ka jingleh bakla. Ka party ka shem ba ka jubab jong phi kam long kaba pynhun bad ka bym lah ban pdaing.”
Namarkata, katkum ka Article III, Clause 5 bad Article XII jong ka riti treikam jong ka Voice of the People Party (VPP), la sospon ïa phi mardor, nalor kaba ap shuh shuh ïa ka rai ban sa shim da ka State Executive Committee.
“Hapdeng kine ki samoi ba la sospon, phim lah satia ban bat ïa kino kino ki kyrdan, ki jingkitkhlieh hapoh ka party. Phim lah shuh ban mihkhmat ha ka kyrteng ka party ha kino kino ki rynsan ne ki jingïalang. Phi dei ban kohnguh ïa ka rai jong ka party bad ban kiar na kaba leh ïa kano kano ka kam kaba lah ban pynsniewdur ïa ka burom jong ka party,” ong ka shithi sha ki saw ngut.
