Shillong, Naiwieng 14: Ka Summersalt kaba long kawei na ki kynhun rwai bapawkhmat ha kane ka jylla ha ka sngi baar ka la pynmih paidbah ia ka jingrwai ha ka ktien Phareng ia kaba la ai kyrteng ‘Survive’, kawei na ki jingrwai kiba don ha ka thup jingrwai baar jong ka kynhun.
Haduh mynta, ka Summersalt ka la lah ban pynmih haduh saw tylli ki jingrwai na kane ka thup.
Ka jingpynmih ia ka jingrwai ‘Survive’, kan sei na ki trop jong ka kynhun ia ki jingphylla ki ban don ha ki 11 tylli ki jingrwai kiba mynta ki nang mih kawei hadien kawei pat. Kane ka jingrwai ka pynkynmaw ruh ia ka jingim jong uwei u paradkhot jong ka Summersalt uba la khladnoh ha u snem 2020.
Ha ka rukom thoh jingrwai jong kane ka kynhun, ka ju tip balei ba ka thoh ia ki jingrwai bad na ka bynta jongno, hynrei ka jingshna ia ka jingrwai ‘Survive’ ka dei kaba maian bha, namar ym shym la tip thikna ka mut aiu, tad haduh ba u lyoh dum u la wan kah ia ka kynhun, da ka jingkhlad noh uwei na ki dkhot, u Bah Baiaineh C. Shangpliang, uba ju khot ieit ‘Nah’.
Ka jingrwai hi, ka pynshlur ia ki nongsngap bad khamtam kito kiba im ka jingim jong ka jingkhuslai ban iakhun bad pyrshang ban im ka jingim kaba khiah krat. Ha ka jingiaid lynti ka jingim ki bun ki diengpyngkiang, hynrei ka jingrwai ka bsut ia ka mynsiem shynrang kaba pynlah ia u briew ban tur sha pyrshah ka dak, kam pher hapdeng ki jingeh jingtynjuh kiba bun.
Ka jingmut jong ka jingpynlait kawei hadien kawei ka jingrwai, ka long ban ioh kem ia ka jingsngewtynnad jong ki nongsngap, kumno ba kin ioh ban puson ia ki kyntien bad ka sur jong ki jingrwai baroh.
Ka jinglong kyrpang jong ka Summersalt ka dei halor ki jingrwai jong ki, kiba don ka khubor ia ka jaitbynriew ha ki sur tynrai, da kaba iamir lang bad ki rukom tem jong ka pyrthei baroh kawei. Ka kynhun hi ka ngeit, ba ka pateng mynta ka donkam ban ia tuid lang bad ki rukom im jong ka pyrthei mynta, hynrei, da kaba bat skhem ia ki jinghikai jong ka mynnor.
Ha ki pathai khubor lajong (Social Media), ka Summersalt ka la pynpaw ia ka jingpyrshang ban buh sah kynmaw ia ka lariti ka jaitbynriew bad ka jingithiang ka mariang jong ka ri lum Khasi, da kaba buh kumne “Ki ranab lum ki i im ha ka jinghap jaijai jong u slap, u lyoh ha ka burom uba ia kynduh ha shiteng suiñ bad ki lum jyrngam. Hynrei, ngim lah ban pynkut noh hangta, khlem ka rwai ka siaw bad ka bam ka dih, ban ialeh kmen ha ki jingkyrkhu Uba najrong ia ka jingim ban shngaiñ ka shnong ka thaw. Ngin pynmih ia ka jingangnud u menbarim.”
Kane thup jingrwai kaba ar, kaba la ai kyrteng ‘KLIAR” kaba don khatwei tylli ki jingrwai, ka pynshisha ba ka rwai ka siaw ha ri Khasi ka dei kaba la ih bha, namarkata, donkam ban ai ia kaba bha tam ban kyntiew ia ka. Halor kane, ka Summersalt, ka la leit sha Mumbai ban pynjanai ia ka jingshna ia kane ka Album. U Bah Kit Shangpliang kum u nongialam ka kynhun u la ong, “ngi la iaid lynti mynta la 15 snem tam bad la pynsngewthuh ia ngi ba ka rwai ka siaw jong ka ri lum Khasi jong ngi, ka la ih bha haduh ba la i donkam ban pynioh ia ka kor kaba bha tam ha ka pyrthei bad iarap ban pynjanai ia kane ka nongmuna, tad haduh ba ngi la rekod ia kine ki jingrwai ha Yaj Raj Films Studios, kawei na ki studio kiba biang tam ha pyrthei.”
Ka jingduh noh ia uwei na ki kaitor jong ka kynhun ha ka 11 tarik u Jymmang 2020, uba long u nongtem ia ka kitar rben ksai, u paralok bad u shipara, u Bah Baiaineh C. Shangpliang (Bah Nah) ka la long kaba pait dohnud bad ka la don noh ka jaka ba suda. Ki bnai ki la nang iaid bad ka kam ka ba dei ban iaid shakhmat ka la nang tyllun kham suki, hynrei, ka jingdwai jong kiba bun kaba la iarap ia ka kynhun ban iaid sha pyrshah ka dak.
Ka sur jong ka kitar rben ksai ha ka thup jingrwai ka dei kaba u Bah Nah u la tem janai bha.
“Haduh mynta mynne, ngi da sngewbynnud haduh katta katta bad ngi ju kynmaw ia ka dur jong u man ba ngi tem ha ki rynsan bapher bapher. Ngi tip ruh ba ka put ka tem jong ka kynhun, ka urlong kumne dei na ka jingnoh synniang jong u Bah Nah. Mynta ngi tip ba ka put ka tem ka Summersalt kaba phalang ia ka put ka tem u Khasi ha kane ka spah snem, ka dei ruh ka jingnoh synñiang jong u hynmen bad u para nongtem jong ngi”, ong u Bah Greg Nongrum.
