Shillong, Jylliew 16: Ka jingther jong u slap uba jur ha South West Khasi Hills ha ka sngi Sajtiaiñ ka la wanrah ia ka jingtwa khyndew ha ki hynñiew tylli ki longïing ki la shah ktah ha ka ïing ba ki shong ki sah.
U District Disaster Management Officer (DDMO) jong ka South West Khasi Hills District Dr. E.S. Lynshiang, u la ïathuh ba ki longïing kiba la shah ktah haduh mynta ki don baroh 12 tylli ki longïing kata 9 tylli na Mawkyrwat C&RD Block bad 3 tylli ha Ranikor C&RD Block.
U iathuh ba ki shnong kiba la shah ktah ha ka jingtwa khyndew ki long ka shnong Mawkhlaitngap, Manad, Lummawbah bad ha Mawpud. La antad ba ka jingtwa ka khyndew kaba la ktah ia kine ki longïing ka la jia ha ka por kumba 1:00 baje mynstep ha ka 15 tarik mynta u bnai.
Ha kawei pat ka jingjia, la iathuh ba ka la don ruh ka jingshah ktah jong ki lyngkha kba bad ka jingtwa ka surok ba dei ïaid na Tynnai sha Mawbidong.
La ïathuh ba ha kine ki jingjia ym shym la don mano mano ba mynsaw ne jingjia ba sngewsih, la ong u Dr. Lyngshiang.
