Shillong, Jylliew 28: Ka seng kieng atiar Hynñiewtrep National Liberation Council (HNLC) ba la shah kheiñ be-aiñ ha ka Sorkar ha ka sngi Thohdieng ka la takraiñ ïa ka tnat Pulit jong ka jylla kaba la khot hajir ïa ki nongïalam sengbhalang ban tohkit halor kaba jingdon jingïadei bad ka seng.
Ha u kyrwoh ba la phah sha ki lad pathai khubor u General Secretary cum Publicity Secretary ka HNLC Bah Saiñkupar Nongtraw u la ong, “haba u Champion Sangma, u DSP barim bad katto katne ki Pulit ki la phet noh na ka kam Pulit bad leit pynïasoh bad ka GNLA, ngi shem ba ka Sorkar lymne ka tnat Pulit kin khot hajir ïa ki Ophisar Pulit. Hato ka long mo kaba dei ïa ka tnat Pulit ban shu khot hajir ïa u President jong kano kano ka seng haba katto katne ki dkhot jong ki kynhun sengbhalang ki leit ban pynïasoh bad ka HNLC da la ka jong ka mon?
U la kam ruh da kaba ong, “haoid, ki lah ban don ki dkhot ha ki sengbhalang, kiba don jingïadei bad ngi, hynrei kata kam mut pat ba baroh kawei ka seng, u President lane u General Secretary kin ïadon bynta lang. Ma ngi, kum ka kynhun, ngin ym len lada uno uno u dei u dkhot bapura, la ki dei na ki sengbhalang lane ki dei ki riewshimet.”
“Kum ka nuksa, u Tarsan Lymba um dei uba don bynta ban pynthei ïa ki bom IED, hynrei ka Sorkar ka kem ïa u khlem kino kino ki sakhi satar. Haba ki Pulit ki kem jubor khlem ki sakhi sabut, ka lah ban ktah ïa ka bor pyrkhat pyrdaiñ bad ka jingshah ktah kaba slem ha uta u briew,” u la ong.
Shuh shuh, u nongïalam ka HNLC u la ong ba ki don ki khep haba ki Pulit ki kem ïa uba shu suba ba u dei u dkhot ka HNLC, u don u pud ba lam sha ka jingïap jong ka kurim jong na ka daw ka heart attack bad uta u briew u mad ïa ka jingbym biang shuh ka bor pyrkhat pyrdaiñ.
“Kaei kaba jia, haba ki Pulit ki kem bad kynnoh bymhok ïa u nongbsa ïa ka ing ka sem? Katba ka HNLC ka lah ban pynphai kylliang da kaba shu rahbor ne da kaba shu pynïap ïa kiba suba ba ki dei ki nongsyntiat ki Pulit, ma ngi, kum ka seng, ngi kiar na kita ki kam khlem da ïoh ïa ki sakhi sabut kiba biang,” u la bynrap.
U Bah Nongtraw u la ong, ha ka jaka ban shimkhia ïa ka jingjyllei jong u drok, ka tnat Pulit bad ka Sorkar i kumba ki pynsyrwa kai da kaba kynnoh bad kem ïa ki samla. Ka jingjyllei jong u drok ha ka imlang sahlang jong ngi, i kumba ka dei shi bynta ka skhim kam bymman jong ka sorkar. U drok u pynjot ïa uba dih shimet bad ïa ka imlang ka sahlang, namarba u pynjot ïa ka imlang sahlang jong ngi. Ka paw kumba ka Sorkar ka kham sngewdei ban bret ïa ka pisa ha ki jingeh ban ïa kaba weng ïa ki jingeh, ka imlang sahlang jong ngi ka la shu shah ieh na kaba kynthih na kawei ka ding sha kawei pat.
U la kynnoh shuh shuh, “ka jingkhynra ba dang shen jong ka HYC, ha kaba u samla la phla ba u la pyndonkam ïa u drok ba la ïoh na uwei u Pulit ka kynhun SWAT, ka pynpaw shynna ïa ki tynrai ba la khaii ïa u drok. Ka pynpaw ruh ba ka jingshalan beaiñ ïa u dewiong ba donkti da ki Ophisar heh kyrdan ka Sorkar, bad u Myntri Rangbah, u Myntri ka tnat Kam Pohing ki dei ki nongkhaii drok bad ki Kingpin.”
