Shillong, Nailur, 09: U nongïalam ka Liang Pyrshah u Mukul Sangma u la buh jingkylli ïa ka rai jong ka sorkar ban ai Pulit pahara ïa ki riew sain pyrthei ba shu thung hi ka Sorkar bad dawa ba u Ophisar u dei ban pynphai noh ïa ka pisa jong u paidbah ba la pynsyrwa kai ha kaba thungkam ïa ki briew kiba la rem ha ka elekshon.
“Ngan sa dawa ïa ka jingïalang jong ka State Security Commission ban shimkhia ïa kane ka jingpynsyrwa kai ïa ka pisa u paidbah da kaba pyndonkam bakla ïa ki bor Pulit. Phi ïohi katno ngut na kine ki riewsaiñ hima ba la shah thungkam ki ïoh lut ïa ki jait kali pahara baroh,” ong u Sangma ha ka jingïakren bad ki lad pathai khubor ha ka Lah Sngi u Blei.
“Kaei ka kyrdan jong u nongïoh jingïada? Ka jingim jongno ka don ha ka jingma? Ïathuh ïa nga mano napdeng kine ki nongshah thungkam ki la shimkhia ban wanrah ïa ka shongsuk shongsaiñ na ki kam lehnoh ba ka jingim jong ki ka don hapdeng ka jingma.? Lada ka jingim jongno jongno ka don ha ka jingma hap ban pynshong nongrim ïa ka kyrdan ai jingïada da ki Pulit. Mynta phin ong ïa u SP bad bthah ban ai jingpahara kyrpang ïa une uwei? Kane ka dei kata ka rukom kaba phi kwah ban pynyrwa kai pisa jong u paidbah?,” u la ong.
“Ngin sa don ka jingpeit bniah bad ka jingkheiñ jingdiah kaba biang ïa kiei kiei baroh bad lada la ai jingïada khlem da donkam da kaba ai kali Pulit, da kaba ai ïa bor pahra ban shu ïaid kai bad ki ban shu khyllew, bad ban pynwit ïa ki paidbah, ngi dawa ba dei ban pynphai biang ïa ka pisa da u ophisar uba leh ïa kata,” la maham u Mukul bad bynrap, “u ophisar ba dei peit un hap ban pynphai biang ïa kane ka pisa baroh, ngin sa peit ïa kata, nga pynthikna ïa ki paidbah ka jylla. Kawei pa kawei ka shi naïa kaba ki la pynlut tang ban pynsngewbha ïa ki heh party lajong ka leit kham bha da kaba ïaid lait na ka lynti kaba thikna jong ka jingkitkhlieh kaba la buh katkum ka ain.”
Kane ka jingkren jong u ka long ruh kum ka jingkylli halor ka jingthung ïa ka MP barim ka Agatha Sangma kum ka Chairperson bathymmai jong ka Meghalaya State Commission for Protection of Child Rights (MSCPCR) ha kaba katkum ka jingong jong u ym dei ban ïakren marwei.
Ha kaba ïadei bad ka jingthungkam ïa ki riewsaiñpyrthei ha ka por jong u kum u Myntri Rangbah, u Mukul ula ong, “hato nga la ailad ïa ki ban pyndonkam bakla? Katno ngut ki nongai jingmut ïa u Myntri Rangbah ki don? Phi lah ban kheiñ? Katno ngut ngi la don? Katno ngut na ki nongshah thungkam na ki riewsaiñ pyrthei ki la ïoh jingïada da ki bor Pulit bad thaw jingkulmar?
Halor ka jingkylli hato ka jingthungkam ïa ki riewsaiñpyrthei ki dei hok ban ïoh ïa kum kane ka jingsuk, u Myntri Rangbah barim u la ong, “dei na kata ka daw ba nga kylli. Ka kyrdan jong u nongïoh jingïada la pynshong nongrim halor ka jingma, dei na kata ka daw ba nga ong ka jingsngewthuh ïa ka jingma. Hato une u Daniel (OSD) u don jingma? Hooid, ki Pulit ki hap ban pyntip. Ki paidbah ki hap ban kylli hato u don jingma, kumjuh ruh bun kiwei pat.”
