Shillong, Naitung 05: Hadien ka jingbteng jong ki Karbi ban thombor ia ki Pnar jong ka shnong Khanduli, West Jaiñtia Hills District kiba leit rep kba, rep soh ha ki thaiñ Khappud bad kiba khang ia ki Pnar ban mih na khanduli ban rung sha ki jaka bashong basah da ki Karbi. Ka Khasi Students Union, Namdong Unit ka la talasi naphang ia ki kali kamai bad ia ki kali jong ki riewshimet ban khanglad ia ki Karbi kiba leit iew sha ka shnong Khanduli.
Ka Seng ha u kyrwoh ba la phah sha ki lad pathai khubor ha ka sngi Balang ka la pynpaw ba kane ka jingtalasi ia ki kali ka dei namar ka jingshah leh donbor jong ki Pnar ha ki Karbi ha kine ki khyndiat por ba la leit noh.
Ka Seng ka kyntu ruh ia baroh ki nongshong shnong jong ka thaiñ bad ia baroh ki Waheh Shnong ba kin iasnohkti lang bad ka Seng ban ym ailad ia ka jingmih jingrung bad ban khaii pateng bad ki Karbi tad haduh ba ka jingsuk kan wan hapdeng ki Karbi bad ka shnong Khanduli.
Ka Seng ka la maham ruh ba lada don kiba ialeh pyrshah kin hap shim hi ka jingkitkhlieh. “Na ka liang jong ka Seng kan iai don ha syndah bad ka shnong Khanduli khamtam haba ki mad kum kine ki jingeh,” la ong u kyrwoh.
