Shillong, Naitung, 05: Ka Meghalaya Awakening Concern Citizens (MACC) ha ka sngi balang ka la pan jingpynshai na ka Myntri ka Koit ka Khiah ka Sorkar Jylla ka Dr. Ampareen Lyngdoh ha kaba iadei bad ka jingbret jong ka tnat ka Koit ka Khiah ha ka 29 tarik u Jylliew, 2023 da ki lak tylli ki dawai ha jaka theh ñiut ha Marten, Shillong.
Dang shen ka DHS (MI), Shillong ka la pynshai ba ka jingaiti sha ka Shillong Municipal Board (SMB) ban bret noh ia ki dawai ba la sniew ia kiba la lum thup ha Central Medical Store, Shillong ka dei namarba kine ki dawai ki dei kiba la sniew namar ka jingbym ioh ban pyndonkam na ka jingwan lynshop jong ka jingpang Covid-19.
U President jong ka MACC u Bah Banshai Marbaniang ha ka jingiakren bad ki lad pathai khubor, “namarba ngim hun ia ka jingpynshai jong ka DHS (MI) ngi la wan ban pan jingpynshai na ka Myntri ka Koit ka Khiah ha kano ka rukom la mang pisa ban thied ia ki dawai. Hynrei ka Myntri ka la ai jubab ba ki dawai ki dei kiba la sniew na ka jingbym iohlad ban pyndonkam ha ki snem ba ka jylla ka la shah lynshop ha ka jingpang khlam Covid-19.”
“Ngin iai dawa ban ioh jingpynshai ia ka thup kyrteng jong ki dawai ba la bret (sha Marten) namarba ka Drugs and Cosmetic Act, 1940 bad ka Drugs and Cosmetic Rules, 1945 ka ong ba ia ki dawai kiba la sniew yn hap ban pynphai sha ki kompeni kiba don ia ki jaka bret bad kin hap ai bujli da kiwei katkum ka Memonrandum of Understanding (MoU) ba la iasoi da ka Sokar bad ki Kompeni kiba pynpoi ia ki dawai kiba kumno ngim lah ban tip haduh mynta,” u la ong.
“Ha ka jylla jong ngi ki don tang 8 tylli ki CHC bad 113 tylli ki PHC, 532 ki Sub-Centre. Ngi shem ba ia ki dawai ba la bret balei ym lah ban pynpoi sha ki CHC, ki PHC bad ki Sub-Centre. Bun ki thaiñ nongkyndong kim don dawai, ki ud ki nam ba kim don doktor,” u la ong.
“Ngi shim ba ka (jingbret ia ki dawai) ka dei ka jingpynsyrwa kai ia ka pisa u paidbah. Kata ka dei kaba ngi hap ban pynpaw. Ka myntri ka la ong ba kan sa phah ia ka kaiphod bad katno ka pisa la mang ban thied ia ki dawai ngim pat tip,” la bynrap u Bah Marbaniang.
“Ka Myntri ka la pyntip ia ngi ba ka dang ap ia ka kaiphod na ka tnat ka Koit ka Khiah bad hapoh shitaiew ynda la ioh ia kaiphod kan sa ai kopi lang sha ngi bad ka kaiphod kaba ngi kwah ka dei ban long kaba shai,” u la ong.
U la kam ruh ba ka jingbret ia ki dawai ha Marten kan buh jingma ia ki shnong kiba don sharum jong kane ka jaka theh ñiut bad ia ka shnong Mawiong namarba ka jingsma kaba mih na ki dawai ba laiphew jait kan ktah ia ka koit ka khiah bad ia ki nongrep kiba don sharum ka Marten.
