Shillong, Rymphang, 16: Hadien 189 snem ka jingkhladnoh jong u Syiem Tirot Sing Syiemlieh, u khlawait nongïaleh laitluid ka ri India uba dei ruh u Syiem jong ka Hima Nongkhlaw, u la ïap ha ka 17 tarik, Naitung, 1835, ha ka jingshah set byndi ha ka Sorkar Bilat ha nongbah Dhaka, mynta ka Sorkar Meghalaya ka la shimkhia ban tei ïa u durmot ha phyllaw jong ka Indira Gandhi Cultural Centre (IGCC), ha nongbah Dhaka, Bangladesh.
Ha ka jingplie paidbah ïa une u durmot jong u Syiem Tirot Sing, la pynkylla ruh ïa ka kyrteng jong ka ICCR Library ha Dhaka sha ka kyrteng, ‘U Tirot Sing Library’.
La plie paidbah ïa une u durmot da u Symbud Myntri Rangbah ka Jylla u Bah Sniawbhalang Dhar ryngkat ka jingsakhi lang jong u Myntri ka tnat Arts and Culture u Bah Paul Lyngdoh, ka Myntri Sorkar ka Dr. Ampareen Lyngdoh, u Chairman jong ka State Planning Board Bah Metbah Lyngdoh, u High Commissioner ka India sha Bangladesh u Pranay Verma, u Commissioner and Secretary uba khmih ïa ka tnat Art and Culture Bah Frederick Roy Kharkongor, u Chairman barim jong ka UPSC u Prof. David R. Syiemlieh, u Adviser ka Sorkar Jylla u Bah Hamletson Dohling, ki MDC jong ka Khasi Hills Autonomous District Council ba kynthup ïa u Bah Titostarwell Chyne, u Bah Teiborlang Pathaw, u Syiem Khynnah jong ka Hima Nongkhlaw u Pa’iem K.M Syiem, u Syiem ka Hima Bhowal u Pa’iem Kynsai M. Syiem, u Syiem Khynnah jong ka Hima Khyrim u Pa’iem Habapan Syiem bad kiwei kiwei.
