Shillong, Rymphang, 16: Ka Khasi Students Union (KSU) South West Khasi Hills District bad Ranikor Circle ha ka sngi Thohdieng ka la ujor sha ka Sorkar Jylla halor ka jingpyndik bad ka jingpharep nongkhaïi da ki shipai Border Security Force (BSF) ïa ki nongkhaïi kiba sah ha ki shnong khappud kiba ju im kamai jakpoh da ka kam die marbam ha ki iew kiba don ki shnong khappud ka South West Khasi Hills District.
Ki lai tylli ki iew kiba heh ha ki shnong khappud ka South West Khasi Hills District bad ka ri Bangladesh ki long ka iew Balat, ka iew Photkroh bad ka iew Nongjri. Nalor kata, sa lai tylli iew Khappud (Haat Border) kiba ju long iew shisien shitaiew, ki long ha Ryngku, Nolikata bad ha Dangar bad ha kine ki lai tylli ki iew khappud ki nongkhaïi ba la ïoh ID Card na ka Sorkar ki ju leit khaii bad ki nongkhaïi na ka ri Bangladesh.
U President ka KSU-SWKHDU samla Forwardman Nongrem ha ka jingïakren bad ki lad pathai khubor u la ong, “ngi la aiti da ka jingthoh ha u Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ba un tuklar halor ka jingpynsuhsat jong ki shipai BSF ïa ki nongkhaïi bad ïa ki paidbah nongleit nongwan kiba shong basah ha ki shnong khappud jong ka South West Khasi Hills District.”
“Dang ki shipai BSF kiba ap pahara ha u Zero Line ki la wan kiew sha ki shnong ba shong basah ki briew, ban talasi naphang ïa ki kali kit marbam ha surokbah Mawkyrwat-Ranikor ha ka shnong Khatphra bad ha surokbah Mawsynram-Ranikor ha lad ka shnong Balat. Ym tang ba ki la talasi naphang ïa ki kali kit marbam, hynrei ki la pharep ruh ïa ki nongkhaïi ba ki dei ki nongkhaïi tuh kiba thmu ban shalan be-aiñ ïa ki marbam sha ka ri Bangladesh,” ong u samla Nongrem.
U samla Nongrem u la ïathuh ba u Bah Prestone u la kular ba ka Sorkar kan sa thaw da ka Subdivisional Level Coordination Committee ka ban khlieh da u SDO (Civil) ka ban kynthup ïa ki shipai BSF, ki Pulit bad ïa ki Rangbah Shnong na ki shnong khappud khnang ban weng noh ïa kane ka jingeh kaba ki paidbah ki ïakynduh.
“Ngi dawa ïa ki bor synshar jong ka East Khasi Hills bad ka South West Khasi Hills ba kin shimkhia ban pynkynriah ïa ki shipai BSF na kine ki shnong briew namarba ka jingdon jong ki BSF ha kine ki ar tylli ki jaka ka pynwit haduh katta katta ïa ki paidbah,” u la ong.
Haba kylli u la ong, “ki kali kit mar ki bun kiba leit sha Haat Bangla. Ka jingïaid kali ka la bun hynrei ym baroh ki kali kiba khaii be-aiñ sha Bangladeh. Hynrei ki BSF kim dei ban tuklar ïa u pud u sam treikam jong ki Pulit bad ki bor synshar district hynrei lym kumta kam don jingmut shuh ïa ki Pulit ban don ïa ki Thanat sha ki shnong khappud lada ïa ka kam jong ki la leh lut da ki BSF.”
U la ïathuh ba ha u snem 2018 ki shipai BSF ki la pyrshang ban shna ktem ha ka thaiñ Rangthong kaba jngai kumba 40 kilomitar na ka khappud. “Ka Seng hi kam lah ban pdiang ïa ka jingtalasi kali kit mar da ki BSF namarba ki paidbah kim ïapei satia ïa ka ktien ka thylliej hynrei lada ka don ka jingtalasi ki BSF ki dei ban ïatreilang bad ki bor Pulit,” u la bynrap.
“Ngi la pynsngew ha u Symbud Myntri Rangbah ba ngim ïashah ïa ki nongkhaïi tuh hynrei ngi pynsngew pat ba ki nongkhaïi ba dei hok hapoh ka District kim dei ban shah pharep bad shah ktah da kumne kumtai,” ong shuh shuh u samla Nongrem.
