Shillong, Nailur, 19: Ki dkhot jong ka Hynñiewtrep Youth Council (HYC) East Jaiñtia Hills District Unit ba la lamkhmat da u President u Bah Dismit Sumer bad u General Secretary u Bah Aniash Manar ha ka sngi Palei ki la thang ïa u drok ba la ïoh kurp na uwei u samla uba ju im kyrni bha ban dih drok bad uba ju khaïi beaiñ ruh ïa u drok.
Ïa u drok ki dkhot ka HYC ki la thang ha ka jaka kaba don hajan ka jaka ba ieng ki trok ha Amrit Cement, East Jaiñtia Hills District.
Ïa une u samla ba la kyrni bha ban dih drok, la ïoh bat da ka HYC ryngkat ka jingïatreilang bad ka Drobar Shnong Umlaper ba la lamkhmat da u Bah Nangbha Shangpung bad u Bah Deimon Manar.
Hadien ba la ïoh kurup ïa u drok ka Dorbar Shnong Umlaper bad ka HYC ki la sneng bad kraw ïa une u samla ba u dei ban kylla noh ka rukom im bad ban iehnoh ïa u drok.
U Bah Poila Pdang uba dei uwei na ki nongshong shnong jong ka shnong Umlaper u la ïathuh ba ki la don ki briew kiba la ïohi ba u samla ba la shah bat u dei uba ju pyndonkam ïa u drok da kaba shong ha kawei ka jaka ha ka shnong Umlaper kaba don hajan ka karkhana dewbilat Amrit Cement da kaba injek drok ïalade. Hadien ba u la ïoh jingtip ïa kane, u Bah Poila u la pyntip sha ki dkhot jong ka HYC bad marmar hi ki dkhot jong ka seng ki la leit ban bat noh ïa u samla ba dih drok.
Ha ka jingtohkit, u samla ba ju dih drok u la phla ba u ju leit shim ïa u drok na ka shnong Malidor bad u ju die ruh ïa u drok sha kiwei pat. U la phla ruh ba u dei uba shong basah ha Khliehriat bad u la pynpaw ruh ba u kwah eh ban kylla noh kaba mut bad na ka liang ka seng ruh ka la kyntu ba u dei ban kylla bad ka seng ruh kan ïarap ban pynpoi ïa u sha ki jaka ai jingsumar lada u kut jingmut ban kylla.
