Shillong, Nailar, 01: Ka Khasi Students’ Union ka la thang da ka ding da ka jubab jong ka Meghalaya Public Services Commission (MPSC) kum ka jingpyrshah halor ka jingkynoh ba ka don ka jingleh tuh ha ka thungkam thungjam bad ha kawei na ki plakad ka seng ka la thoh, “ka MPSC kam dei ka nongkynti jong ki lei san snem ne ki heh spah.”
Ki dkhot ka KSU ki la leit tur sha ka ophis treikam jong ka MPSC hadien la kut noh ka jingaipor kaba 48 kynta ha ka sngi Palei.
Shwa ban thang ïa ka jubab ha ka jingtur kyndit ryngkat bad ki plakad sha ophis treikam jong ka MPSC, u Chairman jong ka Employment Cell ka KSU u Samla Reuben Najiar u la ong, ‘kane ka jubab jong ka MPSC kum ka seng ngin ym lah ban pdiang. Hadien ba ngi ladep pule ïa kane ka jubab ba la phah da ka MPSC ngi la tip shai ba ka don ka jingleh tuh ha thungkam thungjam.’
U la ong ha kaba ïadei bad ka post Statistical Officer ba la pynbna paidbah ha u snem 2019 la pynmih tang kawei ka post bad haba la pynbna ïa ka result ha u snem 2024 ki don arngut, kata, kawei na ki jaidbynriew Khasi-Jaiñtia bad kawei na ki jaidbynriew Garo katba ïa ka post la pynbna tang na ka bynta ki jaidbynriew Khasi-Jaiñtia.
“Naei u mih sa uwei pat u Candidate hadien ba ladep pynmih ïa ka Advertisement. Ka MPSC ka pynmih ïa ka jingpynbeit ba ki don ar tylli ki post. Hynrei kine ki dei kam thok kam shukor suda. Ngin ym lah ban pdiang ïa kane ka jubab jong ka MPSC,” la ong u Samla Najiar.
“Ha kaba ïadei bad ka kam MPS, ngi dawa ba balei la khot personal interview tang ïa ki 27 ngut ki Candidate katba ka kyndon ba la buh dei ban khot personal interview 42 ne 43. Hynrei ki (MPSC) ong ba ha ka Office Memorandum ki ladep batai ban khot noh tang 27 ngut. Kaei kata ka Office Memorandum? Balei phi kylliang shi kylliang ïa ka Office Memorandum? la buh jingkylli une u nongïalam ka KSU.
“Ha kaba ïadei bad ka MCS, kumno phi ong ba ka dei ka jingbakla. Ha ka jubab ki ong, ym tang ma ngi ba bakla, baroh kiba bakla. Kum kata phi nud ban ong, phim lehraiñ? la sangah tyngeh u Chairman ka Employment Cell ka KSU.
“Na ka liang jong ka seng ngin ym pyndem bad ngin ym ailad kum ïa kane ka jubab jong ka MPSC namarba ka dei tang ka jingïalam bakla suda ïa u paidbah,” u la ong.
Katba ki dkhot ka KSU ki dang pynlong ka jingpyrta shla ha phyllaw jong ka MPSC, la wan poi shi kynhun ki Pulit ryngkat bad u Magistrate. Shipor ka la mih ka jingïapyni nia hapdeng ki ar mamla shwa ba u Chairman jong ka MPSC u Bah PR Marweiñ un khot ïakren ïa ki nongïalam jong ka seng.
Hadien ka jingkhot ïakren, na ka liang jong u Chairman ka MPSC u la kular ba ka MPSC kan sa pyllait paidbah ïa ki marks jong ki Candidate kiba la ïakhun ïa ka eksamin Meghalaya Civil Service (MCS) Preliminary Examination ha ka por janmiet.
“Ka jingpyllait ïa ki marks kan dei ka jingtreikam kaba khuid ba suba jong ka MPSC ba kam don kano kano ka jingbuhrieh. Lada ki Candidate ki ïohi ïa ki marks hynrei katkum ka jingsngewthuh jong ki, haba ki la leh bha, ki lah ban pan RTI ne ban leit wad jingtip na ka MPSC,” la ïathuh u Samla Najiar.
U samla Najiar u la ong ba dei ban pynthymmai ïa ka rukom treikam jong ka MPSC khnang ba kum kine ki jingjia kin ym jia shuh ha ki sngi ki ban sa wan.
U la pyntip ba ka KSU kan sa ïakynduh ïa ka Sorkar ha ki khyndiat sngi ban sa wan bad ban aiti ai ka jingthoh ban tyrwa ba dei ban pynjanai ïa ki jingtreikam jong ka Commission.
