Khliehriat, Naiwieng 09: Ka tnat Pulit ha ka sngi palei ka la thang pynkylla dpei ïa u drok ha ka pajwa barhem jong ka karkhana Star Cement, Lumshnong East Jaiñtia Hills Distirct ïa uba la ïoh kurup da ki Pulit na ki snar nongkhaii drok ha kylleng ka jylla.
Ha ka jingthang ïa u drok la sakhi lang da u Director General of Police (DGP) ka Jylla u Dr. LR Bishnoi, u Inspector General Law and Order u Mukesh Singh, u Dy. Inspector General Eastern Range u Davis N. Marak, ki Superintendent of Police, ki Additional Superintendent of Police na East Khasi Hills, West Khasi Hills bad na East Jaiñtia Hills District.
Ïa u drok uba shongdor haduh 4 klur tyngka la thang ha ka pajwa kaba ka jingkhluit ka long haduh 1200 degree centigrade hadien ba la ïoh ïa ka hukum na ka Iïngbishar Meghalaya High Court.
La sdang ban thang ïa u drok da ki Pulit bad hadien kane la thang pynlut da ki nongtrei jong ka Star Cement hapoh ka jingpeit jong u Supervisor.
U drok uba ki Pulit ki la thang ha kane ka sngi u dei uba ki la ïoh kurup na ki 51 tylli ki Case ba la rejister bad kiba ïoh kurup dang ha kine ki khyndiat bnai ba la leit noh, kata, na East Khasi Hills District kiba don kumba 10 tylli ki Case, na Ri Bhoi District 2 tylli ki Case bad na West Khasi Hill Districts 14 tylli ki Case, 25 tylli ki case na West Jaiñtia Hills.
La pynkylla dpei lut ïa u drok ba kynthup ïa u drok Heroin uba shongdor T. 3 klur bad ïa u Ganja uba shongdor T. 80 lak tyngka bad T. 20 lak bad baroh ka poi sha ka T 4 klur. La thang ruh ïa ki dawai kuli Yaba.
La pyntip ruh ba yn sa thang shuh shuh ïa u drok ynda la ïoh hukum na ka Iingbishar.
U Dr. LR Bishnoi u la pan ka jingïatreilang ïa ki lad pathai khubor ban pynphriang ïa ki jingai jingpynshai sha ki paidbah ha kaba ïadei bad ka jingshyrkhei jong u drok. U la ong ruh ba ka tnat Pulit ka la pynlong bun bah ki jingpynshai haduh 1,500 sien ban pynsngewthuh sha ki paidbah ïa ka jingshyrkhei jong u drok bad u la ïathuh ruh ba ki Pulit ka Jylla Meghalaya kim shym la shongthait ban rat dyngkhong ïa ka jingjyllei jong u drok.
Ha kane ka sngi, la pynlong ruh ïa ka jingpynshai paidbah halor ka jingshyrkhei jong u dork ha Donbosco College, Byndihati.
U Dr. Bishnoi u la ïathuh ruh ba ha u snem ba la leit noh, ki Pulit ki la ïoh kurup 24 kilo u drok Heroin ha kaba manla ka kilogram u drok u shongdor haduh T. 8-10 klur. U la ïathuh ruh ba palat 500 ngut ki nongkhaïi drok ki la shah kem bad ki Pulit ki la regjister case bad 135 tylli ki ejahar kiba dei ki Criminal Case.
U Davis N.R Marak u la batai shapang ka jingthang ïa u drok da kaba pyntip ba manla ki district ki don ïa ki komiti bad ha kane ka komiti ki don lang ki kynhun jong ka Sorkar na rilum Khasi Jaiñtia bad na rilum Garo kumno ban tehlakam ïa ka jingkhaii tuh ïa u drok hapoh kane ka jylla.
