Shillong, Nailur, 05: Ka kynhun ki nongïalam jong ka Elaka Labang Nongphyllut ha ka sngi Palei ki la leit ban ïakynduh ïa u Myntri Rangbah ka Jylla u Conrad K. Sangma bad pyni ruh da ki dulir kiba pynshisha ba ki shnong kiba don hapoh ka Block-I ki dei kiba dang hap hapoh u pud u sam jong ka Jylla Meghalaya.
Kane ka jingleit pyni sabut da ki dulir ka long hadien ba u Myntri Rangbah ka Jylla u Conrad K. Sangma ha ka sngi Balang u la pyntip ba ka jingbteng ïa ka jingïakren pynbeit pud ha ka wat kaba ar na ka bynta ki hynriew tylli ki jaka khappud Meghalaya bad Assam kiba dang don hapdeng ka jingïajia kan long la kumno kumno ha u bnai Risaw, 2024.
Ka Elaka Labang Nongphyllut ka hap hapoh ka Block-I kaba dang don mynta ha ka jingïakajia pud bad ka Jylla Assam.
U Pa’iem Laborious M. Syiem ha ka jingïakren bad ki lad pathai khubor u la ong, “ka Elaka Labang Nongphyllut ka dei kawei na ki Hima jong ka Ri Laiphew Syiem Khatar Dolloi. Da ka jingdkhat jubor jong ka Assam ha u snem 1951 ba la shu leh donbor kaba long pyrshah ïa ka jingïatip lem. Ki nongshong shnong jong ka Labang Nongphyllut kiba ïakhih pyrshah ïa kane, ki la shah kem bad shah set along ha ka sorkar Assam.”
“Ha u snem 1957, ka Sorkar Assam ka la thaw da ka komiti ban ïa pynbeit ïa u pud u sam ïa kaba la aidaw ban pynslem da ka Karbi Anglong Autonomous Council (KAAC) ban bishar shwa ïa kane ka kam. Ka jingbym ïasoi ïa ki dulir ha u snem 1957, ka la pynlong ïa ka Labang Nongphyllut ban ïai don ha ka kti jong ka Assam,” la ong u Paiem Laborious.
“Ka jingïakhun jong ki khun ki hajar jong ka Elaka Labang Nongphyllut ka dang ïaineh haduh mynta ba ym dei ban shah pynngat shapoh Assam hynrei ka Elaka Labang Nongphyllut ka dang dei ka bynta jong ka Meghalaya. Ka jingïakhih jong ki khun ki hajar ka Elaka Labang Nongphyllut ka la kot sha ka 73 snem,” u la ong.
U la ong ba kum ki khun ki hajar jong ka Bri u Hynñiewtrep kin ïakhun haduh ba ka Elaka Labang Nongphyllut kan da wan phai biang sha Meghalaya.
“Ngi la kyrpad ïa u Myntri Rangbah, katba u dang ïakren ïa kane ka kam, un ïaleh shitom ban ïakren bad ka Sorkar Pdeng ban thaw ïa ka Joint Action Committee ba kynthu ïa ka Sorkar Pdeng, ka Sorkar Meghalaya bad ka Sorkar Assam ban treikam hapoh ka Elaka Labang Nongphyllut ban peit ïa ki jingdonkam jong ki paidbah katba ka jingïakren pynbeit pud ka dang ïaid shakhmat hapdeng ka Sorkar Meghalaya bad ka Sorkar Assam,” la bynrap u Paiem Laborious.
“Kane ka dei ka jingkyrpad ïa u Myntri Rangbah ba ngim dei shuh ban dang jynjar katba ka jingïakren ka dang ïaid shakhmat,” u la ong.
