Shillong, Naiwieng, 21: Ka North Eastern Hill University Students’ Union (NEHUSU) ka la rai ban thaw da ka Gender Sensitization Committee hadien ba ka la don ka jingjia shah jrong kti jong ki kynthei hapoh ka skulbah North Eastern Hill University (NEHU).
Ha u kyrwoh ba la phah ha ka sngi baar, u Finance Secretary ka NEHUSU u Mandor Diengdoh u la ong hadien ba ki khubor ki la poi sha ki paidbah, ki la don bun tylli ki jingjia kiba la kynnoh pyrshah ia u Nantu Das, uba bat kum u in-charge jong ka Security bad u Asst Director jong ka Sports Department, NEHU ha kaba ka shithi ujor ka la poi sha ka NEHUSU.
U la ong, “hadien ba la bishar da ka NEHUSU ia ki jingujor la lap ba u nongleh kam bymman u donkti bunsien ban leh ia ki kam runar ha kaba ki lanot ki sheptieng ban kren na ka daw ba ki lehraiñ ban pynpaw ialade hakhmat ka pyrthei.”
Hadien kane ka jingjia, u la ong, ki la don ruh ki jingujor na ki samla pule khamtam da ki Research Scholars kiba la kam ba u Guide jong ki, u don kti ha ki kam pohdor.
Da kaba pynpaw ba ka NEHUSU ka la ioh pdiang bun tylli ki jingujor na kiba bun ki samla pule, u samla Diengdoh u la ong, “ka NEHUSU ka sngewdei ban don ia ka jingpynsngewthuh ia ka longkynthei ka longshynrang hapoh ka skulbah na ka bynta ki samla pule, ki nonghikai bad ki nongtrei.”
“Ka NEHUSU ha kaba iadei bad kane, kan sa pynlong ia ka jingpynsngewthuh lyngba ki jingiathir iatai, ki jingiathir nia bad khamtam eh ban thaw ia ka Gender Sensitization Committee ka ban shimkhia ia ki jingshah thombor, ka jingpynkheiñ ia ka jingmynjur bad kiwei kiwei de ki kam kiba iadei bad kine ki jait kam,” la ong u kyrwoh.
“Bun ki jingjia kiba iadei bad ki jingshah jrong kti kin sa nang paw pyrthei ha kine ki sngi ki ban sa wan namarba ki samla pule ki la nang kham iohbor na ka jingioh jingkyrshan bad ka jingai mynsiem sha ki samla pule da ka Union,” u la ong.
U la ong shuh shuh ba ka jingangnud jong ka Union ka long ban sngewthuh ia ka jinglong kynthei jinglong shynrang bad ba ka shlem pule ka dei ban long kaba shngaiñ.
“Ka NEHUSU kaba mynta ka kut jingmut ban rat dyngkhong ia kine ki kam pohdor da kino kino ki nongtrei, ki ophisar ne ki nonghikai pyrshah ia ki samla pule,” la ong ka Union.
