Shillong, Nohprah, 19: Namar ka jingkiew shaba palat ka jingdon jong ki nongshong shnong ka jylla kiba ïabit ïa ka jingpang HIV/AIDS ka Sorkar Jylla ka la rai ban thaw noh da ka Mission khnang ban ïakhun pyrshah ïa ka jingkharoi jong ki briew kiba ïabit ïa kane ka jingpang.
Ha ka jingïakren bad ki lad pathai khubor ha ka sngi Thohdieng, u Myntri Rangbah ka Jylla Conrad K Sangma u la ïathuh ba kane ka mission kan treikam na ka bynta san snem bad ka Kynhun Myntri ka la mynjur ban mang pisa T. 25 klur na ka bynta T. 5 klur shi snem.
“Ngi sngewthuh ba ka rukom ba ngi la shna ïa ka projek DREAM kaba long ka mission mode ha kaba ïadei bad u drok, ngi sngewthuh ba ka jingkiew jong ka jingpang HIV/AIDS ka long kaba shyrkhei bha ha ka jylla jong ngi, ngi donkam ban wanrah ïa ka mission treikam,” la ong u Sangma.
Haba kylli, u Sangma u la ong, “ngam don lut ïa baroh ki jingtip kiba bniah hynrei hooid ka jingkharoi ka kiew. Kaei kaba ngi sngew ka long ba ka jingpang HIV ha Meghalaya ka la nang kiew bha ha kine ki snem ba ladep. Ka jingdon jong kiba la rangbah kiba don ïa ka jingpang HIV ka long 0.43%, kaba palat ïa ka jingkheiñ ha ka ri kaba long 21.21 % bad kiba im bad u khñiang jingpang HIV ki long 9589 ngut eiei kat haduh u snem 2024. Ka jingïabit thymmai ka kiew bha, kumba 982 ngut manla u snem.”
