Shillong, Nailar, 29: Ka Khun Hynñiewtrep National Awakening Movemnt (KHNAM) ha ka sngi Palei ka la phah da ka jingthoh sha u Lat ka Jylla u Chandrashekhar H. Vijayashankar ban dawa bym dei shuh ban dang pynjlan ïa ka samoi treikam kaba la kut jong ki Autonomous District Council ha rilum Khasi bad Jaiñtia.
Ka samoi treikam jong kine ki ar tylli ki ADC ka ladep kut naduh u Lber mynta u snem hynrei ka Sorkar Jylla ka la pynjlan ïa ka samoi treikam sa hynriew bnai ka ban sa kut noh ha u Nailur mynta u snem.
“Ka Party lyngba kane ka shithi ka pynpaw ïa ka jingbym sngewhun halor ka jingpynjlan ïa ka samoi treikam jong ka KHADC bad JHADC haduh hynriew bnai da kaba ai daw ba ka dang don ka jingïapynbeit ryntih ïa ki shnong hapoh ki MDC Constituency,” la ong ka KHNAM ha ka dorkhas sha u Lat ka Jylla ba la soi da u Working President u Bah Thomas Passah bad u General Secetary u Bah James A. Neng.
“Ka jingpynjlan bnai kaba hynriew kan sa kut noh ha kine ki khyndiat sngi ban wan bad katkum ka kaiphod ba ïa ka Delimitation Report jong baroh ar tylli ki Council la mynjur da ka Iingdorbar Thawain jong baroh ar tylli ki Council bad mynta ka dang don hapoh ka jingpeit bniah,” la pyntip ka KHNAM.
“Ka jingpynbeit ïa ki shnong ha ki Constituency ka la dep bad ïa ka kaiphod ladep ban aiti sha ka Sorkar. Namarba ïa ka jingpynbeit ryntih ïa ki shnong ha ki Constituency ka la dep ngi ïohi ba ym don daw shuh ban dang pynjlan shuh shuh ïa ka samoi treikam jong ki Council, ngi kyrpad jur lyngba ka ophis jong phi, ban pynthikna ba ym dei shuh ban dang ailad ban pynjlan shuh shuh ïa ka samoi treikam,” la kyrpad ka KHNAM.
“Ngi pynkynmaw biang ïa kane ka kyndon jong ki Sixth Schedule ha kaba ïadei bad ka kyndon na ka bynta ban pynjlan ïa ki por jong ka District Council. Ka Para (64) jong ka Sixth Scheduled ka kdew shai ba ka jingpynjlan ïa ka samoi treikam palat ïa ka san snem lah ban leh tang lada pynbna ïa ka Emergency lane haba ym pat lah ban pynlong ïa ka elekshon,” bynrap ka KHNAM.
