Shillong, Jylliew, 05: Ki thylliej dieng barhem ki la pynkylla dpei ia kawei ka ing ba dang shu dep shna jong ka Kong Isila Kshiar ha ka shnong Pahamrïoh Them ha ka step phyrngap sngi Balang kat haduh ba ki jingdon jingem hapoh ka iing baroh kawei ki la kylla dpei
Kane ka la jia ha ka por 3:20 baje eiei mynstep bad katkum jingtip ba la ïoh lum la ïathuh ba ka iing jong ka Kong Kong Isila Kshiar ka la kem ding kynsan na ka bynta jong ka iing shetja bad ïa ka daw jong ka jingsdang jong ka ding hapoh ka ïing ym shym la lah satia ban tip.
Ka la ïathuh ba ha ka por ba ka iing ka la kem ding kam shym la don satia ha iing namarba ka leit ban sah ha ka jaka bylla jong ka bad u don tang u khun shynrang uba don jingduna ha ki dkhotmet uba dang thiah lyngngai ha kawei ka kamra thiah hynrei u la ïoh ban mih noh na kamra thia hadien ba ka ding ka la klang.
Tang shu iohsngew ia kane ka jingjia, ki paidbah nongshong shnong ka Pahamriioh ki la pyrshang ban ïarap pynlip ïa ka ding hynrei namar ka jingklang jong ki thylliej ding kim shym la lah ban leh eiei tad haduh ban da poi ka kali pynlip ding, hynrei baroh ki jingdon jingem ki la ingkhong khaid bad kylla dpei lut.
U Secretary Shnong Bah Donroy Kshiar u la pynpaw ïa ka jingsngewsih halor kane ka jingjia bad kum ka shnong ruh ka la pyrshang ban ai jingïarap bad rai ruh ban pynshna biang ïa ka iing kaba thymmai. U la kyrpad ruh ïa ki bor ba dei peit kynthup ia ki nongmihkhmat ba kin phai khmat lem ban ïarap ïa ka longiing jong ka Kong Isila Khsiar kaba mad ïa ka jingduhnoh ïa ka ing ka sem.
