Shillong, Naitung, 08: Ki nongialam jong ka Khasi Students Union (KSU) Mawlai Circle kiba la ioh ia ka jingud jingnam na ki paidbah kiba ju pyndonkam manla ka sngi ban iaid na ka surok kaba pyniasoh na Mawtawar-Mawsiatkhnam-Umrynjah, ha ka Lah Sngi u Blei ki la hiar jurip ia ka jinglong jingman jong kane ka surok kaba la jot rathai bad kaba la buh jingeh ia ki paidbah nongleit nongwan.
Ka seng hapoh ka jingialam jong u President u samla Biangbor Paliar ki la leit ban iakynduh ia u Executive Engineer ka National Highway Bye-pass Bah J. Tariang ban pynsngew halor ka jingsniew shaba palat jong kane ka surok kaba long u budlum jong kiba bun ki shnong kiba ka surok ka sam lyngba shaduh Shillong Airport ha ka shnong Umroi.
Ha ka jingiakren bad ka Batesi Tv u samla Biangbor Paliar u la kyntu ia u MLA bad ia u MDC jong ka Mawlai Constituency ba kin buddien lem halor ka jingkular jong u Executive Engineer halor ka jingmang pisa 10 klur ban shna pynbha ia ka surok sa kumba 10 kilometer.
