TYRWA KA KSU ÏA KA MPSC BAN PYNDUH NOH ÏA KA PERSONAL INTERVIEW HA KA GRADE B,C,D

Shillong, Lber, 06: Ka Khasi Students’ Union (KSU) lyngba ka Employment Monitoring Cell ka la phah dorkhas sha ka Meghalaya Public Service Commission (MPSC) halor ki katto katne ki jingujor ba la ioh na ki samla thep kam ha ki post bapher bapher bad katto katne ki mat ban pynbha bad pynwandur halor ka thung kam thung jam.

Ha kaba iadei bad ka post Junior Divisional Accountant (JDA) hapoh ka Directorate of Account & Treasuries, Meghalaya katkum ka jingpynlait Advertisement,  ki don 69 tylli ki post kiba lait, hynrei ha ka por ba la mih ia ka result la iohi ba don tang 34 ngut. Halor kane, ka MPSC ka la pynshai ba la don tang 34 ngut kiba pas ia kane ka eksamin bad la khot interview tang ia kine 34 ngut. Haba kylli halor ka jingbym pas ki samla, u Secretary ka MPSC u la pynshai ba lehse ka dei ka pass mark ba heh ba la buh da ka Directorate of Account & Treasuries kaba pynlong ba ki samla kim shym lah ban pas namar haba ianujor bad kiwei kiwei ki tnad Sorkar ki buh ia ka Qualifying Marks tang 33 marks bad kiba wan shakhmat kin shah jied. Halor kane ka bynta ka Seng kan ia kynduh bad ka Directorate ban pynsngew ia kine ki jingeh jong ki samla.

Halor ka kam Typist (Ordinary Grade) ha Meghalaya (Civil) Secretariat & Heads of Department ia kane ka kam la pynlait Advertisement ha u snem 2016 na bynta 36 tylli ki post hynrei haduh mynta ka dang sahteng wat hadien ba ladep pynlong ia ka eksamin bad Typing Test. Ka MPSC ka la pynshai ba ka la long kaba la khreh halor kane kam bad ban pynlait noh ki result hynrei ka dang ap tang ia ka Roster ba ka SAD Department kin phah. Ka Seng ka pynrem ia ka SAD Department ka bym shym la lah ban phah ia ka Roster haduh mynta bad pynsahteng ia kane ka kam. Ha kine ki sngi, ka Seng kan leit ujor sha ka tnad ba dei peit ban phah noh ka Roster bad ki samla ki ym shu ap sah.

Halor ka jingsuki ka thungkam thungjam ba la pyniaid da ka MPSC na ka por sha ka por, ka Seng ka ju lap ba ki samla thepkam ki hap ban ap haduh 4-5 snem ba ka jingpynrung kan dep. Kane ka pynduhnong shibun ia ki samla kiba ap kam namar ka rta ruh ka nang iaid bad na ka liang ki samla kiba pas manla u snem ruh ki shu ap khlem don kano kano ka lad ban thep kam. Ka Seng ka la ai jingmut ba ia kino kino ki kam kiba pynbna paidbah (advertised) dei ban pyndep noh hapoh 1 snem na ka tarik ba la pynbna ia ka jinglait kam.

Ka Seng ka la dawa ruh ba na ka bynta ki Grade ne Group B, C bad D dei ban pynduh noh ia ka Personal Interview. Ka Seng ka ju ioh ia ka jingujor manla ka por ba ka don ka jingbamsap ha ka thung kam thung jam bad ka jingleh shiliang ha ka por Personal Interview. Ka Seng ka sngewba kam don jingmyntoi ban don ia ka Personal Interview na bynta kine ki Grade ne Group. Wat ha ki kam Sorkar Pdeng (Central Government jobs) ia ka Personal Interview lah pynduh noh bad kiwei kiwei ki jylla ruh ki la bud ia kata, hynrei balei ba ka Sorkar Meghalaya haduh mynta ka dang leh ka Personal Interview halor kine ki post ne grade bad dei ban weng noh bad ka thung kam thung jam kan long kaba khuid.

Ha kaba iadei bad ka Personal Interview na ka bynta ki Grade ne Group A, ka Seng naduh ki snem ba ladep ka la buh ia ka jingdawa ba ka Personal Interview ka dei ban long ha ki jingdon ki Camera ban lait na ka jinglehtuh jingleh shukor kumba la ju iohsngew na ki por sha ki por. Ka Seng ka pynsngew biang ka thungkam ka thungjam hapoh ka jylla ka dei ban long kaba khuid khnang ba ka jylla baroh kawei hi kan kiew.

Halor kine ki mat, ka MPSC ka la pynshai ba ka shong ha ka mon jong ka Sorkar ban leh ia kine kiei kiei baroh bad na ka liang ka MPSC kam don kano kano ka jingpyrshah. Ka Seng ha kine ki khyndiat sngi kan sa buh ia ka jingdawa hakhmat ba Sorkar ban pynurlong noh ia ka jingdawa ka Seng.