Shillong, Jylliew, 26: Arngut napdeng kiba la shah kynnoh donkti ha ka jingshah pynïap jong u nongkhaii na Indore u Raja Raghuvanshi ki la kyntait ban phla ne ban ai jubab halor ka jingdonkti jong ki hakhmat u Magistrate
U Superintendent of Police (City) Bah Herbert Kharkongor, uba khlieh ïa ka Special Investigation Team (SIT), u la ïathuh ïa kane ka ha sngi Palei haba jubab ïa ka jingkylli hato ki briew kiba shah kynnoh ki la phla ne ai jubab eiei neem katkum ka Section 164 jong ka Code of Criminal Procedure (CrPC).
“Ngi la phah ïa ki arngut napdeng ki san ngut ki briew ba la shah kynnoh-u Akash Rajput bad u Anand Kurmi – hynrei ki la kyntait ban ai jubab (ne phla) hakhmat u magistrate,” la ïathuh u Bah Kharkongor ha ka jingïakren bad ki lad pathai khubor.
“Hynrei kata kam leilei namarba ngi la don ïa ki sakhi sabut ban pynshisha (ïa ka jingdonkti jong ki ha kane ka jingjia),” la bynrap u Bah Kharkongor.
Ki nongshah kynnoh ki don ka hok ban kyntait ban phla ne jubab hakhmat u Magistrate, la ïathuh u Bah Kharkongor.
Watla katta, u SP u la pynpaw ïa ka jingsngew skhem ba ki Pulit ki don ïa ki sakhi sabut kiba biang ban pynshisha halor ka jingjia bad ong ruh ba ki Pulit kin sa pyndep noh hapoh 90 snem ban ïoh pynngat kyndon.
“Ngi don ki sakhi kiba biang. Naduh kaba sdang bad haduh mynta ruh kino kino ki tiar kiba ngi don kine ki dei ki sakhi kiba biang. Ngin ap ïa ka kaiphod jong ka FSL bad nga thikna ba kan nang pynkhlaiñ shuh shuh ïa ka case”, u la ong.
Ka SIT ka dang tohkit ïa kane ka kam bad ka dang durut ban ïoh lum shuh shuh ïa ki sakhi sabut. Ki Pulit ki la kut jingmut ban pyngngat kyndon noh hapoh 90 sngi.
Baroh san ngut kiba la shah kynnoh, kynthup ïa ka Sonam Raghuvanshi, u samla jong ka u Raj Kushwaha, u Akash Rajput, u Vishal Singh Chauhan, bad u Anand Kurmi, la set mynta ha Judicial Custody halor ka jingdonkti jong ki ban pynïap ïa u Raja ha Sohra ha ka 23 tarik Jymmang.
