Shillong, Naiwieng, 06: Ka jingiakhih jong ki samla pule ka skulbah NEHU kiba don hapoh ka shatri jong ka North Eastern Hill University Students Union (NEHUSU) ban dawa weng kam ia u Registrar u Col. (Retd) Omkar Singh bad ia u Deputy Registrar (Academics) u Amit Gupta ka la nang khluit shuh shuh da ka jingkyrshan jong ki samla pule ka skulbah NEHU ka Tura Campus.
Ha kane ka jingiakhih ki samla pule ha Tura ki la ai jingkyrshan ia ka jingdawa jong ka Union ba dei ban wengkam mardor ia u Registrar bad ia u Deputy Registrar (Academics) halor ka nongrim ba kim pat long kiba bit ban pyniaid ia ki kam ophis hapoh kane ka skulbah kumba ki la lap ha kine ki khyndiat bnai baladep naduh ba la thungkam ia ki.
Ha Shillong Campus, ki samla pule haduh mynta ki dang pynlong ia ka jingiakhih da kaba shah thngan khlem pud sngi da ka jingkyrshan lang ka KSU NEHU Unit.
Ka NEHUSU ha ka sngi Balang ka la sei madan ruh ka jingthungkam ka skulbah North Eastern Hill University, Shillong ia u Amit Gupta kum u Deputy Registrar.
Ka Union ka la sei madan ruh ia ka Notice ba la pynmih ha ka 13 tarik Iaiong, 2023 ba la soi da u Registrar (incharge) u Prof. AS Dixit kaba iadei bad ka jingpyni ia ki briew kiba aplai ia ka post Deputy Registrar ki don tang 44 ngut kiba ibit ban shah jied ban shimti kane ka kam katba u Amit Gupta u don ha ka kyrdan kaba 147 bad u la shah pynngat ha ka thup “not eligible’ ne u bym ibit ban shah jied ban shimti ia kane ka kam.
Ki nongialam jong ka NEHUSU ki la buh jingkylli ruh ia ki bor pyniaid jong ka skulbah NEHU da kaba ong, “kumno u Amit Gupta uba la shah kyntait bad shah pynngat ha ka thup “Not Eligible” u la shah jied ban shimti kum u Deputy Registrar hapoh kane ka skulbah.”
Ia ka jingbym botbor jong u ban trei ia kam, la lap na ka shithi kaba u la soi ha ka 16 tarik Risaw, 2024 ia kaba u la phah sha baroh ki Head jong ki Department ka skulbah NEHU ha kaba ka jingthoh jong u ia ka ktien phareng ka la long thik kumba thoh u khynnah uba dang leit skul ym kat ka kyrdan jong u ophisar uba la bat ia ka kyrdan ophisar kaba la pynlehraiñ haduh katta katta wat ia ki nonghikai bad ia ki samla pule jong ka skulbah NEHU.
