Shillong, Nailar, 14: Da kaba buh hakhmat ia ka thong ban iarap ia ki khynnah rit bad ia ki kynthei kiba donkam ia ki jingiarap ba kyrkieh ha kylleng ka jylla Meghalaya baroh kawei, ka tnat Social Welfare jong ka Sorkar Jylla ha ka 14 tarik u Nailar, 2023 ka la mynjur ban pynkha 14 tylli ki post ki ban pyntyllun ia ka jingpyntreikam jong ka Child Helpline Service lyngba u Nombar 1098 khnang ba ki khynnah rit kin dup lah ban telephone ia une u nombar haba ki mad ia kino kino ki jingeh ha ka jingim ka jong ki bad ha kajuh ka por la pynbna paidbah ruh ia u nombar 181 ban ai jingiarap ia ki kynthei haba iakynduh ia kino kino ki jingeh.
Ha ka jingiakren bad ki lad pathai khubor, u Myntri jong ka tnat Social Welfare u Bah Paul Lyngdoh u la iathuh ba ka jingpynkha thymmai ia ki 14 tylli ki post hapoh kane ka tnat treikam ka long hadien ba ka tnat Social Welfare lyngba ka Juvenile Justice Care and Protection Act 2015, ka la pyntreikam ia ka Child Helpline Services hapoh ka Vatsaliya Scheme ha u snem 2019 hynrei ka jingpyntyllun ia ka kam ka long beit tang da uwei u briew.
Katkum ka jingiathuh jong u Bah Paul Lyngdoh, ki post kiba la pynkha thymmai ki kynthup ia kawei ka post IT Supervisor, 10 tylli ki post Call Operator, kawei ka post Multipurpose Staff bad ar tylli ki post Security Guard.
