Shillong, Nailar, 14 : Ka Meghalaya State Olympic Association ryngkat ka jingiatreilang bad ka tnat Sports and Youth Affairs jong ka Sorkar Meghalaya lem bad ka Meghalaya Athletic Association ka la pynbna ban pynlong biang ha ka sien kaba ar ia ka Sohra International Half Marathon kaba 21 kilomitar ka ban sa long ha ka 30 tarik u Nailur, 2023.
Ki nongialam jong ka Meghalaya State Olympic Association, kynthup ruh na ka tnat Sports and Youth Affairs bad ka Meghalaya Athletic Association ha ka jingiakren bad ki lad pathai khubor ha ka 14 tarik u Nailar, 2023, ki la iathuh ba ka tarik ba khatduh ban pynrung kyrteng ha kane ka jingmareh marathon ka long haduh ka 12 tarik u Nailur, 2023.
Ka jingthmu haba pynlong ia kane ka marathon ka long ban khring ia ki nongjngohkai pyrthei sha kane ka jylla Meghalaya khnang ban kyntiew ia ka iohkam iohjam jong ki paidbah.
Ki nongpyniaid ki la iathuh ba ha kane ka jingmareh marathon kaba don lai bynta ka ban sdang na ka shnong Laitsohpliah haduh Mawsmai, ki kynthup ia ka jingmareh kaba 21 kilomitar, 10 kilomitar bad kaba 5 kilomitar.
Ka khusnam na ka bynta ki Elite group ka long 1 lak tyngka ia kiba wan nyngkong, 70,000 hajar ia kiba wan baar bad 50,000 hajar ia kiba wan balai.
