Shillong, Naiwieng, 09: Ka North East Students Organisation (NESO) ha ka sngi Saitjaiñ ka la pyntip ba kan sa phah da ka jngthoh sha ka Ministry of Education, ka Sorkar India halor ki jingjia hapoh ka skulbah North Eastern Hill University (NEHU).
U Chairman ka NESO u Bah Samuel B. Jyrwa da lade u la leit jngoh ïa ki samla pule ka skulbah NEHU kiba pynlong ïa ka jingshah jingit mynta la saw sngi kynthih ban dawa ba dei ban weng kam mardor ïa u Registrar u Omkar Singh bad ïa u Deputy Registrar (Academics) u Amit Gupta.
Ha ka jingïakren bad ki lad pathai khubor, u Chairman ka NESO u la ong, “ngi ai jingkyrshan ïa ka jingïakhih jong ki samla pule namarba ka jingïakhih jong ki, kam dei na ka bynta ka jingïohnong shimet hynrei ka dei na ka bynta ka jingbha jong ka University.
“Na ka liang jong ka NESO ngin sa phah da ka jingthoh sha ka Ministry of Education ïa kaei kaba la jia ha NEHU bad ka Sorkar India ka dei ban shimkhia ïa kane ka kam bad ka dei ruh ban shim ïa ki sienjam ba dei,” ong u Bah Jyrwa.
Haba kyntu ïa ka Sorkar Jylla ban shimkhia ïa ka jingjia ha NEHU, u Bah Jyrwa u la ong, “namarba ka skulbah NEHU ka don ha kane ka ka jylla, ka Sorkar Jylla ruh ka ladei ban shimkhia namarba ka jingeh kaba don hapoh ka NEHU ka ktah nyngkong eh ïa ki samla pule ka jylla bad ïa kiwei pat ki samla kiba pule ha NEHU. Nga sngew ba ka dei ka kamram jong ka Sorkar Jylla ban pynbeit, ban tuklar ïa kiei kiei ki jingjia hapoh kane ka skulbah.”
U la ïathuh ba ka NESO kan sa phah ïa ka jingthoh sha ka Ministry ha ka lah sngi U Blei jong ka taiew ban sa wan lyngba ka email.
“Ngi sngew ba ka Ministry of Education ka dei ban shimkhia ïa kine ki jingjia bad lada kim shimkhia, ka pyni ba ka Sorkar India ruh kam da sngew donkam eh ban peit ïa ki jingeh bad ki jingjynjar jong ki samla pule, hynrei ngi sngew ba ka Ministry ka dei ban peit ïa ki jingeh kiba mynta la bun bun bnai,” u la ong.
“Ka jingshah thngan jong ki samla ka la poi mynta sha ka 100 kynta tam bad lada jia eiei kaba sniew, ka Sorkar India bad ka Sorkar Jylla ruh ki dei ban shimkhia ïa kine ki jingeh,” la bynrap u Bah Jyrwa.
Haba kylli, u Bah Jyrwa, ula ong, “ngim sngewphylla shuh ba ïa ki mat ki jura jong ngi ka thaiñ Shatei Lammihngi teng teng ki leh matlah bad ki leh kyllut. Ka Sorkar India lyngba ka Ministry of Education ka dei ban shimkhia ïa kine ki jingeh kiba don hapoh ka skulbah kiba wanrah ka jingïohnong ïa ki samla pule hynrei lym kumta, ka jingsngew jngai jong ki jaidbynriew trai ri trai muluk jong ka thaiñ Shatei Lammihngi baroh kawei na ka Sorkar India kan nang ïar ka jingïadei.”
“Kumba ka KSU ka dei ka kynhun kaba don hapoh ka shatri jong ka NESO, ngi sngap beit na kine ki kynhun (KSU), kaei kaba kin ong ïa ka NESO bad ka NESO ruh ka kloi ban leh,” u la bynrap.
U la ïathuh ruh ba mynshwa ki ju don ki jingïakhih jong ki samla pule hapoh skulbah NEHU hynrei kam ju poi haduh une u pud kumba ka long mynta kat haduh ba ki nongpeit jong ka skulbah kin pyneh haduh katta katta.
“Mynshwa ki don ki jingïakhih, hynrei tang shu ïakren bad u Vice Chancellor ki kam ki la beit na ka bynta ka jingbha jong ka skulbah. Kane ka skulbah ha ki snem ba mynshwa ka don beit sha ki kyrdan ba halor hynrei naduh ba wan une u Vice Chancellor ba mynta ka la poi shabar ka kyrdan kaba 100. Kane ka dei ka sien nyngkong ba ki samla pule ki la hap ban shim ïa kane ka sienjam namar ka jingleh thurmur jong u Vice Chancellor ka wanrah ïa ka jingduhnong ïa ki samla pule, ïa ka skulbah bad ka jingduhnong ïa ka jylla,” la ïathuh u Bah Jyrwa haba ïanujor ïa ki jingjia kiba mynshwa bad kiba mynta hapoh ka skulbah NEHU.
Shuh shuh u la kynthoh ba ka jingpyneh jong u Vice Chancellor ka mih na ka jingsngew hangamei bad ka jingsngew heh bad na ka jingbym nang pynïaid kam ki pynmih ïa kine ki jingeh.
