Shillong, Nohprah 21 : Ka Khasi Students’ Union lyngba ka Education Cell hadien ba ka la ioh ïa ka jingujor na ki samla pule ka jylla ki ban ïakhun ïa ka ekamin CSIR NET exam 2023 ka ban long ha ka 26, 27 bad 28 tarik u Nohprah 2023, kiba hap ban leit ïakhun ïa kane ka eksam shabar jong ka jylla kum sha Jorhat bad Dibrugarh.
Ka seng mynta ka sngi ka 21 tarik u Nohprah 2023, ha ka jingïalam u samla Richest Malngiang bad u samla Shelkitbok Kharbani Assistant Education Secretary CEC ka la leit ban ïa kynduh ïa u Education Minister jong ka sorkar jylla u Rakkam A Sangma ha ka ophis treikam jong u ha Secretariat. Ha kane ka sngi la don ryngka ruh u Adviser ka myntri pule puthi ka sorkar jylla u Bah Himalaya Shangpliang.
Ka seng ha kane ka jingïakynduh ka la ïoh ban ïakren bad pynpaw halor kane ka jingeh jong ki samla pule ki ban ïakhun ïa kane ka eksamin, hadien ka jingiakren bad ki nongïalam ka seng, na ka liang jong u Myntri ka pule puthi u la kular ba un shimkhia mardor ïa kane ka kam, bad ha khmat jong ki nongialam ka seng hi u la phone sha u Senior Director National Testing Agency (NTA) ban khmih bniah ïa kane ka kam bad ban pyntikna ba ki samla pule ka jylla ki dei ban ïoh thoh ïa kane ka eksamin hapoh ka jylla la jong.
