Shillong, Naitung 12: Ki nongïalam ka KSU Laitumkhrah Unit bad ki nongialam jong ka KSU-CEC, ki la ujor sha u Superintendent of Police ka East Khasi Hills halor ka jingpynngat kyndon jng ki Pulit ka Laiumkhrah Police Station ïa ki dkhot ka KSU khlem nongrim.
Ki nongialam ka KSU ki la pynpaw ia kane ha ka khyllipmat ba President bad u General Secretary ka KSU Laitumkhrah Unit ki la leit hajir ha Laitumkhrah Police Station ha ka sngi Thohdieng.
Ka seng ha ka ujor ka la ong ba ha ka jingkhynra, la don lang ki Pulit ka Laitumkhrah PS, ki Pulit na ka Anti-Infiltration Directorate, na ka tnat Labour bad kiwei kiwei ki tnat.
“Ki kyndon kiba pynngat ïa ngi kim dei satia kiba long katkum ka aiñ, hynrei kidei kiba la shu thaw hi. Tangba na ka liang jong ngi, ngim tieng satia”, la ong ki nongialam ka Seng.
“Ngim dei kiba biej ban shu leh kumta, hynrei ka dei tang ka jingthaw suda ban pynbudnam ïa ngi,” la ong ki dkhot jong ka Seng.
Ki nongïalam ki la ong ruh ba kin bteng beit kane ka jingkhynra katba ka Sorkar kam pat pyntreikam ïa ka aiñ MRSSA bad ruh ban buddien ban pyntreikam ïa ka ILP.
Ha kajuh ka por ki Unit jong ka KSU kiba don ha kylleng kylleng ki jaka ki la pynlong ka jingleit khynra ïa ki nongbylla bar jylla ban talasi ïa ki kot ki sla jong ki.
Ka jingkhynra ka la long ruh ha Upper Shillong, Mylliem bad kiwei kiwei de ki jaka.
U General Secretary ka Seng, u Bah S. Kharbani, u la ong ba la lap 20 ngut ki nongbylla bar jylla ki bym don ki Work Permit na Upper Shillong.
Na ka liang ki Kontraktor ruh ki la ïatreilang bad ka seng ban phah noh ïa ki.
U Bah Kharbani u la ong ruh ba ka Seng ka pynlong ia kane ka jingkhynra kum ban bteng ia ka jingkhynra ka Seng ia ki nongbylla bar jylla kumba la sdang da ka KSU Central Body ban buh ïa ka ILP Check Gate ha Ribhoi ha ka 6 tarik mynta u bnai.
