Shillong, ïaïong, 30: Uwei na ki nongshah mudui uba dang dei u khynnah uba dang hapoh 18 snem ha ka por ba la jia ka jingkynnoh shah leh be-ijot ïa kawei ka samla hadien ba la pynsaphriang ïa ka video ha ka WhatsApp, u la ujor ejahar kylla pyrshah ïa kane ka samla ha Rynjah Police Station.
Katkum u kyrwoh ba la phah da u Superintendent of Police ka East Khasi Hills Rituraj Ravi ha ka sngi Baar, la ïathuh ba une u khynnah u la kynnoh kylla ba u la shah leh khlemakor ha kane ka samla.
U SP u la pyntip ba ki Pulit ki la register case hapoh ka POCSO Act bad Indian Penal Code bad ka jingtohkit mynta ka la ïaid shakhmat.
Kum ban shu pynkynmaw hangne, kane ka samla kaba la don kumba 26 snem ha ka 20 tarik mynta u bnai ka la mudui da ka ejahar sha ki Pulit ka Rynjah Police Station halor ka jingshah leh be-ijot ha ki saw ngut ki khynnah kiba la don kumba 20 bad 21 snem ka rta.
Katkum kane ka ejahar kane ka samla ka la ïathuh ba kane ka la jia ha kawei ka jaka ha nongbah Shillong ha u bnai Nailur, 2023 bad ïa ka video ba ki la ring dur ha ka por ba ki la leh be-ijot ïa ka ki la pynsaphriang ha ka Social Media shwa ka elekshon Lok Sabha kaba dang dang shu dep long shen.
Kane ka samla ka la phla ba ka ïa ithuh ithaw bha ïa uwei na pdeng kine ki saw ngut lyngba ka jingïalehkai PubG bad ha u bnai Nailur, 2024 une u paralok jong ka, u la khot sngewbha ïa ka sha ing bad da ka jingshaniah ïa la u jong u paralok ka la leit sha ing jong u khlem suba ïa ka jingmut sniew barieh jong u. Dei ha kum kane ka por ba ma u bad lai ngut ki paralok ki la khleh da u jingdih pynbuaid ha ka umsoh bad ai dih ha ka kat haduh ba kam tip briew shuh ïalade. Dei ha kane ka khyllipmat ba ma u, bad ki lai ngut ki paralok ki la shim kabu ban leh be-ijot ïa ka ryngkat bad ka jingring video ïa kane ka kam pohjait.
