Shillong, ïaïong, 30: Ka kynhun ki samla wadkam ha ka sngi Baar ki la byrngem ban ujor sha Ingbsihar Meghalaya High Court lada ka Sorkar Jylla kam lah ban pynbeit ïa ka jingdkoh ha ka rta rungkam ha ka jingthungkam ha ka tnat Pulit.
Kane ka kynhun ki samla wadkam ba la lamkhmat da ka samla Barilang Pyngrope ki la aiti ïa ka dorkhas ha u Secretary ka tnat Home (Police) u Bah Cyril V. Diengdoh.
Ha ka jingïakren bad ki lad pathai khubor hadien ba la aiti ïa ka dorkhas, ka samla Barilang ka la ong, lada ka Sorkar kam lah ban pynbeit ïa ki jingduna ba ki la kdew, kim banse ban leit ujor sha ka Ingbishar.
Ka la ong ba ka jingkwah jong ki samla wadkam ka long ba ka rta rungkam ha ka tnat Pulit ka dei ban long katkum ka Office Memorandum (OM) jong u snem 2022.
Kane ka samla ka la ong hadien ba la ïohi ba ka sorkar ka la buh ïa ka Revised Guidlines khlem da pynmih ïa ka Notification, mardor ki samla wadkam ki la mih shakhmat ban pynpaw ïa ka jingpyrshah halor kane da kaba leit pynsngew sha ki bor ba dei khmih bad sha ka tnat Kam Pohing.
