Shillong, Jylliew, 25: Ka Khun Hynñiewtrep National Awakening Movement (KHNAM) ha ka sngi Baar ka la mudui da ka ejahar pyrshah ïa u nongïalam ka BJP halor ka jingkynnoh bym shong nongrim ïa ki kam kiba ïadei bad ka Jylla Meghalaya.
Ha ka ejahar ba la aiti sha u Officer in-charge ka Cyber Crime, u Working President ka KHNAM Bah Thomas Passah u la ong ba u Ashwini Upadhyay, uba dei u nongsaidaiñ bad u nongïalam ka BJP, ha ka video ba la saphriang ha ka social media, ki jingkynnoh ki long kiba lamler, kiba ïalam bakla bad kaba kham kongsan eh ka long ba ka phah ïa u kyrwoh ba ïalam bakla sha ka ri baroh kawei ha kaba ïadei bad ki kam jong ka jylla Meghalaya.
“Ki jingkren da u riewshimet ba la kdew haneng kan wanrah ïa ka dur kaba bakla ha kaba ïadei bad ki jingtreikam jong ka jylla hakhmat ka ri baroh kawei bad kan buh jingma wat ïa ka jingim jong ki nongshong shnong ka jylla kiba pule/ba trei bad ba shong basah ha ki bynta bapher bapher jong ka ri. Namarkata, ngi buh ïa kane ka jingujor pyrshah ïa u khnang ban leh eiei katkum ki kyndon jong ka aiñ,” la ong u Bah Passah.
Ka ejahar ka la kdew ruh ruh ïa ka jingkren jong u Ashwini Updhyay ba la kynnoh, “ka ingdorbar thawaiñ, ka sorkar, bad ka Iingbishar kim treikam satia ha jylla Meghalaya. Dei ka Balang kaba synshar ïa ka jylla baroh kawei, bad ki nongïalam Balang ha ka jylla ki pynïaid ïa ka jylla. Ba, ki Hindu ki la hap ban mih bad ym shym la shah ïa ki ban mane ïa ka niam jong ki hapoh ka jylla. Ba, ki Pulit kim treikam bad kim leh eiei ha ka jylla. Ba, ki sengbhalang ki dei tang ki kynhun jong ki nongtuh bad ki nongdawa pisa. Ba, ki lad pathai khubor ha ka jylla kim treikam.”
