Shillong, Jymmang, 18: Ka Kur Malngiang ha ka sngi Saitjaiñ ka la pynkup burom ia ka samla Eulalia Autruina Malngiang kaba la jop ia ka kyrdan kaba ar ha ka rynsan iakob thei bhabriew kaba la tip kum ka Miss Global International Ambassador kaba la long ha ka ri Nepal ha ka 1 tarik u Iaiong, 2024.
Ia kane ka rynsan iakob ba la iashim bynta da ki thei bhabriew kiba la wan mihkhmat na ka ri Phillipines, Sri Lanka, Malaysia, Nepal bad kiwei kiwei ki ri la pynlong da ka Global Model India.
La phiah ia ki nongiashim bynta ha kane ka rynsan iakob kaba san sngi lynter ha la ki jong ki kyrdan ba kynthup ia ki khynnah rit, ki samla lud, ka kyrdan Miss bad Mrs.
Ha ka jingpynkup burom ia ka Eulalia Autruina Malngiang la sakhi lang da u nongialam jong ka seng Congress u Bah Emmanuel Badwar uba la long kum u Kongsan, u Bah Janai Nongkynrih uba la long kum u Symbud Kongsan bad kiwei kiwei kiba la shah khot sngewbha.
Ka Samla Eulalia haba kren ha kane ka sngi pynkup burom ka la ong, “ka jingiaid lynti kam long kaba suk, hynrei lada phi ngeit halade bad phi trei shitom phin sa lah ban ioh kheit ia u soh jong ka jingjop.
Ka la iathuh ba ka la sdang ia ka jingiaid lynti sha ki rynsan iakob thei bhabriew ha ka por ba ka la pyndep ia ka SSLC.
“Dei i mei jong nga, iba la ai mynsiem ba ngan iakhun ia ka Miss Cherry Blossom. Ki don ki synran iakob kiba la nga jop ki don kiba ngam shym la jop bad dei lyngba kine ki jingshah rem kiba la pynlong ia nga ba ngan trei shitom shuh shuh,” la ong kane ka samla.
Ka la iathuh ruh ba kam shym la poi pyrkhat ban ioh phong ia ka pansngiat Miss Global International Ambassador ha ka kyrdan baar ban pynliem ia kiwei kiwei ki thei samla na kiwei pat ki ri kiba iashim bynta ha kane ka rynsan iakob.
“Haba phi don ka jingshaniah halade, ngeit bad pynurlong ia ka jingphohsniew bad phin sa ioh ia ka jingjop,” ka la bynrap.
