Shillong, Jymmang, 18: Ka Thiar Lyngwiar Dpei Society (TLDS) ryngkat ka jingiatreilang bad ka Khasi Department jong ka St. Anthonys College, Shillong ha ka sngi Saitjaiñ ka la pynkup burom ia ka Kong Silbi Passah kaba la ioh pdiang ia ka khusnam Padma Shri dang shen na ka kti jong ka President ka ri India ka Droupadi Murmu ha New Delhi.
Ha kane ka jingialang la pyllait paidbah ruh ia ka kot kaba la thoh da u Dr. Rev. Fr. Ioannis Warpakma ba la ai kyrteng ‘Paradigms of conflicts in the work of H.W Sten,’ da ka Prof. Streamlet Dkhar kaba la long kum ka Kongsan ha kane ka sngi ryngkat ka jingsakhi lang jong kiwei kiwei kiba la shah khot sngewbha.
Ka Thiar Lyngwiar Dpei Society ka la pynlong ruh ia ka jingkynmaw burom ia ki arngut ki nongthoh bakhraw jong ka jaidbynriew Khasi, kata, ia u Pahep Rabon Sing Kharsuka, ia kaba la ai jingkren da u Dr. Sylvanus Lamare bad halor ka jingim jong u Pahep Radhon Sing Berry ba la ai jingkren da ka Prof. Bakhiamon Rynjah.
Ka Prof. Streamlet haba ai jingiaroh ia ka Kong Silbi Passah, ka la ong, “i Kong Silbi i la ioh bun tylli ki khusnam ha ki snem ba mynshwa bad i long ka briew kaba sngewrit ban pynrit ialade. I long ka briew kaba trei shitom bad kaba kloi ban iarap ha kano kano ka por ba donkam.”
Haba kynthoh khyndiat halor ka jingpyllait ia ka kot jong u Dr. Rev. Fr. Warpakma ka Prof. Streamlet ka la ong, “kum u Scholar nalor ka kam kum u Principal i la aipor ban wad bniah. Ka long ka burom ia nga kum ka nonghikai jong i, namarba ka jingtrei shitom jong i, i da pyni ba ym dei ban da ioh Degree hynrei ka dei ka jingieid ia ka Litereshor ha ka ktien Khasi. Watla i pas na ka English Department hynrei i la wan sha ka Khasi Department. Ngi da sngew burom ia phi Phadar ba na kane ka jingwad bniah ka jong phi, kan da ai jingmyntoi shibun eh kiba pule ia ka Khasi Literashor.”
“Ka dei kaba nyngkong eh napdeng ki jingwad bniah ba la ioh ia ka Degree ban pynshongnia bad pynshong nongrim ia ka sengnia ka jong i halor ka Psycho-Analysis,” la ai jingkynthoh ka Prof. Streamlet.
Ka la pynkynmaw ruh ba dei u Prof. HW Sten uba la sdang nyngkong eh ia ka Khasi Department ha NEHU bad kane ka shnat treikam dei da ka jingtrei jong u bad kiwei pat ki Professor. “Nga la long ka samla pule banyngkong eh jong ka Khasi Department bad nga la ioh shibun ki symboh jingstad na u Prof. Sten. Ka jingaiti lut jong i, ha ka kam hikai, ban kyntiew ia ka Department bad khammtam eh ban wanrah ia ka Literary Criticism,” la bynrap ka Prof. Streamlet.
Ka la iathuh ba ki lai tylli ki kot jong u Prof. HW Sten kiba u Dr. Rev. Fr. Warpakma u la wad bniah ki long, ‘ka samla na nongkyndong,’ ‘ka mahadei’ bad ka “kwah bymjukut.
