Shillong, Nailar 27 : Ka long kaei kaei kaba pynsngew sarong haduh katta katta lada pynshong nongrim ia ki shlem pule kiba don ha ki jaka ba kham kyndong ha kaba kiba bun balang kim da patiaw eh ia kum kine ki jaka pule kiba don sha ki jaka nongkyndong hynrei ha kine ki por ba mynta kam da pher shuh na ki jaka pule kiba don ha sor. Kawei na kine ki shlem pule ka dei ka St. Xavier’s College kaba don ha ka shnong Umoid kaba hap hapoh ka South West Khasi Hills District.
Ka jingpawkhmat jong kane ka shlem pule ia kaba la peit bad pyniaid da ki Phadar jong ka Balang Catholic na ka jingiasyllok Jesuit ka long hadien ba ka la sei bluit ia ki samla pule jong kane ka college kiba la iohrung ha ka top 10 ha ka eksamin jong ka sobject Political Science ba la pynlong da ka skulbah North Eastern Hill University, Shillong.
Ka samla Bashimti Snaitang na ka shnong Nonglang ka la wanrah burom ia kane ka College bad ia ka South West Khasi Hills District baroh kawei da kaba ioh rung ha ka Top 10 ha ka subject Political Science.
Ka samla Bashimti Snaitang ka dei na ka Batch ne ka kynhun ba nyngkong eh jong ki samla kiba pule ia ka Bachelor of Arts ha St. Xavier’s College Umoid. Da kane ka jingpas bha jong kane ka samla, ka paw shynna ba ki jaka pule kiba don sha ki jaka ba kyndong jong ka jylla kim iapher shuh bad kiwei pat ki jaka pule kiba don ha sor.
