Shillong, Rymphang, 21: U Myntri Rangbah ka Jylla Conrad K Sangma ha ka sngi Balang u la wanrah ia ka mang tyngka kaba dun T 2,029 klur na ka bynta u snem 2024-25 bad pynbna ruh ia ka ‘Mission 10’, kum ka thong ban pynlong ia ka Jylla Meghalaya kaba kynjoh sha ka ioh kot kaba USD 10 Billion shwa u snem 2028.
Haba kren halor ka mang tyngka, u Sangma uba peit ruh ia ka tnat Pla Tyngka, u la ong ba ka jingioh lum pisa na ka bynta u snem 2024-25 ka long T. 27,072 klur, ha kaba ka jingioh lum khajna la khein antad ba kan long T. 23,515 klur bad ka jingioh pisa na kaba shim ram ka long T. 3,557 klur. Lait noh na kaba shim kylliang kaba kot T.3,527 klur, ka jingioh lum pisa la khmihlynti ba kan kot T. 23,545 klur.
U la iathuh ruh ba ka jingpynlut pisa kan kot T. 27,072 klur, ha kaba ka jingpynlut na kaba ioh lum khajna la khein antad ba kan kot T. 19,653 klur bad ka jingpynlut na ka pisa ba la shim ram kan long kumba T.7,419 klur. Laitnoh ia ka jingpynphai ia ka pisa ba la shim ram kaba kot T. 1,498 crore, ka jingpynlut pisa baroh kan kot haduh T. 25,574 klur.
Ka jingsiew ia ka sut na ka bynta u snem 2024-25 la khein antad ba kan kot T. 1,236 klur bad ka jingsiew ia ka baibam tymmen ne ka penshon kan kot T. 1,865 klur.
“Namarkata, nga wanrah ia ka mang tyngka na ka bynta u snem mang tyngka 2024-25 kaba duna T. 2,029 klur, kaba long kumba 3.83 percent jongk a GSDP,” la ong u Sangma haba wanrah ia ka mang tyngka hapoh ka Assembly.
“Nga kwah ba baroh ki dkhot jong kane ka ing bad ia baroh ki nongshong shnong ba kin kynmaw ia kane ka mang tyngka kum ka ‘Mission 10’, ka thong ban kynjoh sha ka jingphaikhmat ka jylla ban kiew ka ioh ka kot kaba USD 10 billion lyngba ki 10 tylli ki lad ki kabu bad bad 10 ki jingkular. Ka jingpyndep ia ka ‘Mission 10’ ha u snem 2028 kan iatakhuh bad ki 10 snem ka jingtreikam jong ka Sorkar MDA,” u la bynrap.
