Shillong, Jymmang, 08: U samla Kevinstrong Lawriniang uba la ioh ban bat ia ka kyrdan kaba nyngkong eh ha ka result Secondary School Leaving Certificate (SSLC) ha u snem 2021, mynta ka kynti ruh u la ioh rung biang sa ha ka Top 10 jong ka result Higher Secondary School Leaving Certificate (HSSLC) Science Stream ia kaba la pynna da ka Meghalaya Board of School Education (MBoSE) ha ka sngi Balang.
Ha ka jingiakren bad u nonglum khubor ka Batesi Tv uba khmih ia ka Eastern West Khasi Hills District u samla Kevin ula iathuh ba mar iadep pule ia ka Class-X u la bteng ia ka jingpule ha St.Anthony’s Higher Secondary School, Shillong ha ka Science Stream hynrei namar ka jingban jong ka jingpang um banse ban leit phai noh sha la shnong bad ban bteng pat ia ka jingpule ha Mairang Presbyterian Science College.
Da ka jingbteng jong u samla Kevinstrong ia ka jingpule ha kane ka College ka la pynlong ruh ia ka Mairang Presbyterian Science College, Mairang ban thaw ia ka rekod kaba nyngkong eh ba ka College kan ioh rung ha ka Top-10 ha ka result HSSLC mynta u snem.
U samla Kevinstrong uba la ioh distinction ha baroh ki sobjek bad ioh khur 454 mark.
U la iathuh ruh ba um pat nang ban ban rai shano un bteng ia ka jingpule namarba un hap ban iakren shwa bad la ki bahaing hasem bad kum u samla uba wan na ka longïing ka baduk ba kyrduh um nud ban pynpaw ia kaba u angnud ioh ba ki bahaing hasem kim lah ban kyrshan ia u.
