Shillong, Jymmang 08: Ka Khasi Students’ Union (KSU) lyngba ka Education Cell ka phah ïa u kyrwoh ai khublei sha baroh ki paradoh para snam na kylleng ka ri khasi kiba la ïoh ïa ka result HSSLC Commerce bad Science Stream ba la pynbna da ka Meghalaya Board of School Education (MBoSE) ha ka sngi balang.
“Ka jingkhublei ba kyrpang ruh ka leit sha kito ki samla kiba la ïoh kheit ïa u soh ka jingjop da kaba wan kham shakhmat ha ki kyrdan bad ha ki subject ba ki pule. Ka jingïoh ban kheit jong phi ïa u soh ba thiang ha kane ka kynti ka long ka jingkmen ym tang ïa phi shimet hynrei ïa ka ïing ka sem, ka shnong ka thaw, ka ri bad ka jaitbynriew hi baroh kawei,” ong u kyrwoh ba la phah da u Chairman ka Education Cell ka KSU.
Ka Seng ka da sngew sarong shikatdei eh ban ïohi ba ki khun samla ka jaitbynriew ki wan shakhmat ha ka jingpule jong ki, namar ka jingnang jingstad, ka jingtip jingshemphang ka dei ka atiar ba khraw ban ïada, ban pynneh pynsah bad ban kyntiew ïa ka ri bad jaitbynriew ha baroh ki liang.
“Ka seng ka kitbok kit rwiang sha kito ki samla ki bym shym la poi sha ka thong ha kane ka kynti, ba kim dei ban duh jingkyrmen, pynban, ba kin nang ïai trei shitom ba kin lah ban leh bha ha kawei pat ka kynti bad ba kin kynmaw ba ka jingshahrem kam dei ka lad ba khatduh hynrei ba kan long u mawjam sha ka thong jong ka jingjop,” la ai mynsiem ka seng.
Ka Seng ka kitbok kitrwiang sha baroh ki samla ki ban sa ïoh ïa ka result HSSLC Arts Stream bad ha ka SSLC ha kine ki sngi ki ban sa wan ba kin ïoh ban kheit ïa u soh ka jingkmen u ban long ka jingsarong ïa ka ri bad ka jaitbynriew hi baroh kawei.
Ka Seng ka kyntu ruh sha ki samla kiba la ïoh ïa ka resol bad kumjuh ki ban sa ïoh, ba ki dei ban jied bha ïa ki bynta kiba ki dei ban pule, khnang ba kan ym sepei bad kan long kaba kham janai katba nang san ha ka jingpule.
Kyntang ïawai ka Seng ka buh ia ki jingduwai sha baroh ki paradoh parasnam ba kin ïoh ïa ka met kaba koit kaba khiah kumjuh ba kin ïoh ïa ka bor jabieng kaba khlaiñ, ba kin kiew ha baroh ki liang khamtam ha ka jingpule kaba kin nang iai bteng shuh shuh.
