Shillong, K’lyngkot, 25: Hadien ka jingkhlad noh jong kawei ka samla kaba leit shah sumar ha NEIGRIHMS hospital hadien ba la mih ka jingkynnoh ba ka dei na ka jingleh torti bad ka jingleh bym patiaw jong ki nongsumar, ka Hynniewtrep Achik National Movement (HANM) ha ka sngi Palei ka la ïakynduh ïa u Director u Dr. Nalin Mehta ban tih bniah ïa ka jingshisha.
Katkum ka jingkynnoh jong ki bahaiing kane ka samla kaba la 23 snem ka rta ha ki lad pathai khubor la ong ba ki bor ba dei khmih ïa kane ka jaka sumar kim shym la pyni satia ïa ka Report bad ki la shu rah beit beit ïa ka nongpang sha Intensive Care Unit (ICU) naduh ka 17 tarik tad haduh ka 22 tarik ha kaba wat ki doctor ruh kim shym la leit jngoh satia ïa ka koit ka khiah jong kane ka samla.
Shuh shuh ki bahaiing ki la pyntip ba ki bor pynïaid jong kane ka jaka ai jingsumar haba ki ïa ka Report kim shym la ai satia hynrei ki ai tang ïa ka Death Certificate jong kane ka samla hadien ba ka la khladnoh
Ha ka jingïakynduh ïa u Director ïa ka kynhun jong ka HANM la lamkhmat da u President ka seng u Bah Lamphrang Kharbani bad aiti ruh da ka dorkhas ban pynpaw ïa ka jingsngewkhia halor kane ka jingjia.
Ha ka dorkhas, ka HANM ka la maham tyngeh lada ki dang don kum kine ki jingjia hapoh kane ka hospital, ka seng kam banse ban shim da kiwei pat ki lynti jong ka aiñ ne wat ban shu khang khyrdep noh shisyndon ïa kane ka hospital.
Ha ka jingïakren bad ki lad pathai khubor, u Assistant Secretary ka Seng u Bah Wyraiwan Sohtun u la ïathuh ba u Director u la pyntip ba hapoh 10 sngi yn thung ïa ka jingtohkit halor kane ka jingjia bad na ka liang jong ka HANM ruh ka la kyntu ïa u Director ba u dei ban khlieh hi dalade ïa ka jingtohkit khnang ba kan long kaba khuid.
Ka Khun Hynñiewtrep National Awakening Movement (KHNAM) ka la phah ruh da ka jingujor sha ka Meghalaya Medical Council ban dawa ba dei ban thung da ka jingtohkit halor ka jingjia ha NEIGRIHMS Hospital kaba lam sha ka jingduhei jong ka samla kaba la 23 snem ka rta ban duhei ïa la ka jong ka jingim.
