BYRNGEM ÏAKHIH KA KSU LADA ÏAKHIH KA MMLDF
Shillong, Lber, 30: Ka Khasi Students’ Union (KSU) ka la bthah ia ki dkhot jong ka Coordination & Welfare Committee (CWC) Shella Bholaganj & Adjoining Areas ban mih markhmat ym ban shu jler bad jaw ummat kuratia hakhmat ka Sorkar bad ka pyrthei lyngba ki lad pathai khubor.
“Ka jingpharep pyrshah ia ki dkhot ka KSU da kine ki poiei lyngba ka CWC ka pyni dak ba kine ki briew ki kob pyrshah ia ka KSU da kaba ialam bakla ia ki paidbah khlem ki sakhi satar kiba paka. Ka KSU ka kob ia uta u Gopal Dey ba lada u nud un wan mih markhmat bad ki dkhot ka seng ban pyni ia ki sabut ba u don halor ka jingkynnoh jingpharep jong u pyrshah ia ki samla ka seng. Mano uta u Gopal Dey?,” la byrthen ka KSU ha u kyrwoh ba la phah sha ki lad pathai khubor ha ka sngi Saitjaiñ lyngba u General Secretary u samla Donald V. Thabah.
“Une u briew bad kiwei ki la mih ha ki lad pathai khubor ha u snem 2020 hadien ba ki jaidbynriew ki jong ki, ki la hiar thma kynsan ia ka jingialang pyrshah CAA bad dawa ILP jong ka KSU ha kaba da ki phew ngut ki dkhot ka seng ki la shah tied shah bom ha kine ki poiei da ki tiar ialeh tad haduh ba la pait ka khlieh bad lyngkien ka snam ha surok bad kumjuh ruh ka jingbthat jubor ia ka jingim ba kordor u Bah Lurshai Hynñiewta, u dkhot ka KSU Sohra Circle. Halor ka jingujor ejahar bad pynher shithi sha u Myntri Rangbah ka jylla, ha kaba ki poiei lyngba ki CWC ki la kynnoh laiphew jait ia ka seng bad ki paid Khasi. Ka KSU ka pynsngew sha baroh kito ki poiei kiba don hapoh ka shatri jong ka CWC ba kin tyngkan la u thylliej ioh poi sha ka mynsaw namar ka seng kan ym shong kli kti bad sngap kuman ia ka jingber bih kine ki poiei nalor ba ki thom naphang ia ki Khasi trai Ri trai muluk,” la ong ka KSU.
“Ka seng ka sngew ba lada kita ki poiei ka CWC ki sngew kutlad palat ha jylla Meghalaya ki dei ban leit phai noh mardor sha shnong trai jong ki, ka Bangladesh bad sa leh katba ki sngewmon ha ri lajong. Tangba katba ki dang sah ha meiramew u Khasi kan bha shibun ia ki bad ki jaidbynriew jong ki ban ym mushlia lane tuklar ia ki aiñ ki kanun Khasi, ka khyndew ka shyiap u Khasi, ka khaii pateng u Khasi bad ka iaid ka ieng u Khasi,” la ong ka seng.
Ka KSU sa shisien ka pynsngew ba nalor ka jingdawa ia ka ILP, ka Article 371, ka jingpynkup bor shuh shuh ia ki District Councils ka dawa ruh ba ka Cut-off Date lane tarik ot kyrteng ia ki nongshong shnong ba pura ka jylla Meghalaya kan dei beit 24 tarik u Lber 1971 bad ia kito kiba wan kiew na East Pakistan/Bangladesh hadien kane ka tarik dei ban bret noh ia ki sha la ka ri, kata, ka Bangladesh.
“Kyntang ia wai ka KSU ka kyntu ia ki para Khasi ba kin ym ngop lane shah ialam bakla ha ki khubor hamsaia ki poiei lyngba ki lad pathai khubor lane social media namar kane kan pynpait bad pharia ia ka Jaidbynriew rit paid Khasi. Ka buit sianti ki poiei ka long ban pyni ba ki shah thombor (playing the victim card) katba napoh napoh dei ma ki kiba sdang ban kynshoit ban thombor ia ki Khasi kumba dang shu jia shen ha Keatinge Road bad NEHU,” la ong ka KSU.
“Kum ka Jaidbynriew ngi dei ban iatylli ban ia ryntih ha kum kane ka saw ka siaw ha kaba ka umsaw kaba shyrkhei ka ap ban tap lup ia ka Jaidbynriew rit paid Khasi. Ka KSU kan ym ailad da leilei ruh em ia ki poiei shi sngi ban leit trai khlieh ha Ri Khasi. Kam pher lada shah bom shah tied, shah set along ne wat ban iap ruh, hynrei ki dkhot ka seng ki tur beit da ka jingshlur ban iada ia la ka jaidbynriew ba la suit la shor da u mynbarim,” ong shuh shuh ka KSU.
“Ka KSU ka maham ba lada kata ka Meghalaya Minority Linguistic Development Forum kan pynlong jingiakhih ha Bri i Hynñiewtrep, ka KSU ruh kan iakhih lang halor ka jingshah pyniap klep bad jingshah thombor ki Khasi na ka por sha ka por ha ki bar jylla,” la ong u General Secretary ka KSU.
