AITI Noh SHA KA CBI/NIA LADA KI PULIT KIM ÏOHKEM ÏA KI RUNAR HAPOH SHITAIEW
Shillong, Lber, 30 : Ka Coordination and Welfare Committee (CWC) Shella Bholaganj Block kaba long ka kynhun ba la thaw da ki bar jylla ha ka sngi Thohdieng ki la ujor sha u Myntri Rangbah ka Jylla u Conrad Kongkal Sangma halor ka jingshah pyniap jong ki arngut ki bar jylla dang shen ha ka shnong Ichamati.
Ha ka ujor ba la soi da u President ka CWC, Shella Block, Gopal Dey u la dawa ia ka Sorkar Jylla ban kem mardor ia ki briew kiba donkti ban pyniap ia u Ishan Singh bad ia u Sujit Dutta ha Ichamati ha ka 27 tarik mynta u bnai bad dawa ruh ban aiti ia ka jingtohkit sha ka CBI/NIA, ban siew bailutksasn sha ki bahaing hasem jong kine ki arngut kiba la shah pyniap bad ban pynthikna ia ka jingshngaiñ jong ki bar jylla Hindi kiba buhai shnong ha Ichamati bad ha ki shnong bamarjan.
Ka CWC ka la phah ruh ia kane kajuh ka jingujor sha u Myntri Rangbahduh ka ri Narendra Modi bad sha u Myntri ka tnat Kam Pohing Amit Shah bad sha u Lat ka Meghalaya u Phagu Chauhan.
Lyngba kane ka ujor, ka CWC, Shella Block ka la teipop ba dei ki dkhot runar jong ka Khasi Students Union (KSU) kiba la pyniap ia u Ishan Singh bad ia u Sujit Dutta.
Haba buh jingkylli ia ki bor synshar, ka CWC ka la ong, “ka Ichamati, ka dei ka shnong kaba hap hapoh ka East khasi Hills District jong ka jylla Meghalaya kaba la pyllait na ki kyndon jong ka CAA namarba ka hap hapoh ka Sixth Scheduled, ka dei ruh ka jaka kaba ka Khasi Students Union ka la pynlong ia ka jingpyrshah ia ka CAA kaba lam sha ka jingshah pyniap jong u Ishan Singh bad u Sujit Dutta. Ha kaba iadei bad kane, ka jinglong jingman kaba ngi mad ia ka jingim kaba syier bad ka jingartatien, ngi kwah ban buh jingkylli, kumno la ailad ban pynlong ia ka rally ha Ichamati? haba ka (Model) Code of conduct ka la treikam?”
Ka CWC ka la buh jingkylli da kaba ong, “shano ki Pulit ki don haba ki dkhot jong ka KSU ki wan da ki kali ha Ichamati bad thombor ia ki bar jylla kaba wanrah ia ka jingkulmar bad ka jingsahh pyniap uwei u Bengali bad uwei u Adivashi kiba dei ki nongbylla kit maw.”
“Hato ka Sorkar Jylla ka dei tang ka Sorkar tang jong kawei ka jaidbynriew? Hato ki bym dei ki riewlum kim dei ki nongthep vote/ki nongshong shnong ka Meghalaya? Hato ka Sorkar kam lah ban leh eiei pyrshah ia ki kynhun shitkhlieh ka Jylla Meghalaya.? Sa katno ngut ki ban duhei ia ka jingim ba ka Sorkar Jylla bad ka Sorkar Pdeng kin iohsngew ia ka jingud jingiam jong ki bymdei riewlum ha Meghalaya? la buh jingkylli shuh shuh ka CWC.
“Hato u kpa uba duhei ia la u jong u khun tang na ka daw ki runar ka KSU un ioh ia ka hok? la kylli shuh shuh ka CWC.
Ka CWC ka la kam ba ka jingjia ka la jia hadien ba ka rally pyrshah ia ka Citizenship Amendment Act ba la pynlong da ka Khasi Students’ Union (KSU) bad kiwei kiwei ki sengbhalang ha Ichamati, katkum ki khubor jong ki lad pathai khubor.
“Ka jingiaumsnam ha ka jingiakhih pyrshah ia ka CAA kaba ladep ka la jia ha ka shnong Ichamati kaba poi haduh u pud ba ki bar jylla kiba sah ha kane ka thain kim lah mutdur. Wat hadien ba la sakhi kum kine ki jingjia ha u snem 2020 ha ka jingiaumsnam ha Ichamati, balei ki bor synshar district ki dang ai jingbit ia ki kynhun ban pynlong ia ka rally ha kajuh ka jaka?” la kynthoh ka CWC lyngba u Gopal Dey.
“Nga phah ia kane ka jingthoh sha phi ban dawa ia ka hok jong ki arngut kiba la khladnoh bad ki bahaing hasem jong ki bad baroh ki khun shynrang bad kynthei ka Meghalaya kiba shah ibeiñ ha kawei ka liang tang namarba kim dei na kajuh ka jaidbynriew heh paid. Nga phah ia kane ka jingthoh ban pynpaw ia ka jingsngewkhia jong nga halor ka jingjia ba dang shen jong ki briew ki bym dei ki riewlum ha Meghalaya. Ki ain bad ki kyndon ka jylla kiba la thmu ban iada ia ki trai jylla, hynrei ki la long pynban ki mawsiang ba iatakhuh ia ki nongshong shnong bar jylla. Bun tylli ki jingshah typyrkhing, bun tylli ki Rul, bun tylli ki ain (kiba treikam tang ia ki bar jylla ka Meghalaya) ki la buh jingeh ia ki bym dei ki trai jylla ban shong ban sah bad ban kamai kajih ha ka jylla, shah khanglad ha ka ioh ka kot, ka kamai kajih, ka jinglaitluid, bad wat ha ka jingim,” la kynnoh u Gopal Dey.
“Sa kawei ka jingeh ba la mad da ki bym dei ki trai jylla ka dei ka jingbym don ia u nongmihkhmat. Ka sainpyrthei kaba dei beit thik tang ia ki trai jylla ha Meghalaya bunsien ka la khñoit ia ka sur jong ki bym dei ki trai jylla, ka la buh jingeh ia ki ban kren haba wanrah ia kino kino kino ki rai kiba ktah ia ka jingim jong ki,” kynnoh shuh shuh u Dey.
“Shuh shuh, ki bar jylla kiba sah ha Meghalaya, bunsien ki mad ia ka jingshah ibeiñ bad shah kiar, kaba ktah pat ia ka jingim kaba mariaryngkat watla ki shong ki sah hapoh ka jylla. Kane ka jingshah ibeiñ ka lah ban ktah ha kiba bun rukom, kynthup ia ki ing ban shong ban sah, ka pule puthi, ki lad iohkam iohjam bad kaba kham shyrkhei ka dei ka jingduh ei ki nongkynti bad ka jingim. Ka long kaba donkam ban ithuh ia baroh ki nongshong shnong ka Meghalaya, khlem da kheiñ kyrdan riewlum, dei ban niew lang bad ban ai ia ka hok ba mar ia ryngkat,” ong shuh shuh u Dey.”
“Namarkata, nga kyntu ia ki bor ba dei peit ba kin pdiang ia ki jingai jingmut khnang ban kan pynjanai ia ka im, ka shong ka sah jong ki bym dei ki riewlum ha Meghalaya da kaba kem mardor ia ki runar kiba donkti ban pyniap ia ki bar jylla khnang ba ka shongsuk shongsaiñ kan don hapoh ka Jylla. Lada ki bor pulit kim lah ban kem ia ki nongleh kam bymman hapoh shitaiew, ia ka jingtohkit dei ban aiti noh sha ka CBI/NIA,” la dawa ka CWC.
“Dei ban pynthikna ba ki bym dei ki riewlum ki dei ban ioh jingiada na ki kam bymman bad ban iada na ki jingshah pynmynsaw bad na ki kam runar da ki kynhun shitkhlieh ka Meghalaya pyrshah ia ki ritpaid (bar jylla) jong ka jylla Meghalaya. Ban buh ia ka Permanent Security Outpost/ CRPF/ ne kino kino ki Para-military Camp ne Post ha ki jaka kum ha Bholaganj bad Ichamati,” dawa ka CWC.
Ka CWC ka la kynnoh ba bun na ki sengbhalang naduh ba la pynkha ki dei kiba donkti ban pynphriang ia ka jingisih pyrshah ia ki bar jylla ritpaid ha Meghalaya bad niew ruh ia ki bym dei ki riewlum kum ki “Bar Jylla”. Ha kawei pat ka liang ne ka jingbym leh eiei jong ka Sorkar Jylla ka pynlong ia ki runar jong kynhun sengbhalang ban ngeit ba ki dei kiba kham halor jong ka aiñ. Namarkata, dei ban thaw ia ka aiñ kaba pyrkhing khnang ba ka Sorkar kam lah ban shu bret ia ka jingkitkhlieh bad ia ki nongleh kam bymman dei ban kem bad ym ba kin shu iai sah ha ki kot tang kum ki “runar bym ithuh durkhmat.”
Ka CWC ka la dawa ia ka Sorkar Jylla ban tem ia ka jingibeiñ bad ban wanrah ia ka jingialong kawei hapoh ka jylla khnang ba ki trai jylla bad ki bar jylla kin im suk im saiñ hapoh ka jylla bad ha kajuh ka por kane ka kynhun ka la dawa ban ai jingkyrshan bad ai jingiarap sha ki jaidbynriew bar jylla khnang ban kyntiew ia ka bha ka miat ka jong ki hapoh ka Jylla Meghalaya.
