Shillong, Nailar 06: Ka United Democratic Party (UDP) shen kan sa shim ïa ka rai ha kaba ïadei bad ka jingpynïeng kyrtong ha ka ilekshon shiteng samoi ka ban long ha Gambegre.
Haba kren sha ki lad pathai khubor ha ka sngi Baar hadien ba la wai ka jingïalang jong ka Central Executive Committee (CEC) u President jong ka party u Bah Metbah Lyngdoh u la ong ba ka party ka la ïasyllok ha kaba ïadei bad ka jingpynïeng kyrtong ha Gambegre ban ïakhun ïa ka ilekshong shiteng samoi kaba long kaba donkam hadien ba u MLA barim ka seng Congress u Saleng A Sangma u la iehnoh ïa ka kam hadien ba u la jop ïa ka ilekshon MP na Tura.
“Ngi ieh ïa kane ka kam ha ka jingstad jong ki nongïalam na Garo Hills region. Ki la pan por ha shwa ba kin shim ïa ka rai kaba khatduh ha kaba ïadei bad kane ka kam,” ong u Bah Lyngdoh.
Ha kaba iadei bad ka jingpynkhreh ia ka Elekshon sha ki Autonomous District Council (ADC) u Bah Lyngdoh u la ong ba ka party ka la rai ban khot application ïa kiba kwah ban ïakhun bad kane ka kam ka la ïaid shakhmat bad kyntu ruh ïa ki nongïalam jong ki block bad ki district ban pynshisha ïa ki kyrtong.
Ka samoi treikam jong ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) ba la pynjlan sha ka 6 bnai kan sa kut noh shen bad ka Sorkar kan hap ban pynlong biang ia ka elekshon kaba thymmai.
U la ong ruh ba ka UDP bad ka Hill State People’s Democratic Party (HSPDP) kin dang ïatreilang hapoh ka shatri jong ka Regional Democratic Alliance (RDA) ha ka elekshon MDC kumba ladep iatreilang ha ka elekshon MP.
