Shillong, Ïaiong 3 : U President ka HYC Sohra Circle u Bah Cornerstone Sohtun u la khot la wer ia ki paidbah ba kin ia mih ryntih ha ka por 12 baje jong ka 3 tarik u ïaiong 2024 ban ia snohkti lang bad ka KSU ban tur sha Sohra Police Station kum ka dak ka jingpyrshah ia ka jingshah kem ki 2 ngut ki dkhot ka KSU kiba la shah kynnoh ba ki donkti ban pyniap ia ki 2 ngut ki bar jylla ha Ichamati.
Ka HYC-Sohra Circle ka pynpaw ia ka jingbitar ban iohi ba ki Bor pulit ki kloi bha ban thwet bad kem ia ki dkhot jong ki Sengbhalang haba don kano kano ka jingjia. Ki kloi ruh ban pynkit ia jingshah kynnoh ha ki dkhot jong ki Sengbhalang ka Ri Lum Khasi-Jiantia lada jia ei ei ia u Mynder shisngi. Hynrei lada jia ei ei ia u Paradoh parasnam jong ngi, ki ialeh ban tem bad pynthynda katba lah. Ka jingkem ia ki dkhot ka KSU-Sohra shiteng miet shiteng synnia bad ban pynngat ia ki kloi lan ha ki kyndon ain watla khlem da don ki sabut satar kiba biang halor ka jingjia ha Pyntha Umdan (Ichamati) ka long kaei kaei ka ba ngim lah ban pdiang kum ki dkhot ka Jaidbynriew.
Ki bor pulit ki leh klet bad kim leh ei ei haba u Vicky Dey u byrngem byrsit ia ki dkhot ka Jaidbynriew. Wat haduh mynta kim shym la lah satia ban kem ia une u briew. Ym dei ba kim lah hynrei ngi tip bha ba kadei namar ba kim ioh bor satia na ki bor ba halor ki jong ki ba kin kem. Hynrei ia ki jong ngi pat tang da ki katto katne kynta lane sngi ki kloi ban thwet bad kem tang ban pynhun ia ki bor ba halor ki jong ki.
Kumta, kum ka Seng, ngi khot, ngi wer bad ngi kyntu ia baroh ki Nongshong Shnong ka Dong ka Thain Sohra ba kin ia mih ryntih lashai ka sngi, kumba lah khot lah wer da u Nongialam ka KSU South Khasi Hills, ba phin ia mih lang ryntih ban tur sha Sohra Police Station ha ka por 12baje nohphai sngi ban pynpaw sha ki bor pulit bad ka Sorkar ba kim dei ban leh mata madei ia ka lawei ki khun samla ka thain jong ngi da kaba pynngat ki case ba har rukom namar kan ktah ia ka lawei ka jong ki bad kumjuh ruh ban pynpaw ba kum ki nong shong shong ka dong ka thain ngi pynrem jur ia ka jingleh jong ki Pulit bad ki bor Sorkar ban shu pharep kulmar ia ki khun samla jong ngi, pynkut ka kyrwoh na ka HYC Sohra Circle.
