Shillong, ïaïong 02: Ka Khasi Students Union (KSU) South Khasi Hills District Unit ka la wer ia ki dkhot bad ia ki kmie ki kpa jong ki dkhot ba kin mih paidbah lashai ka sngi Balang ban tur sha Sohra Police Station halor ka jingshah kem jong ki arngut ki dkhot ka seng ha ka por shiteng synñia ka Lah Sngi u Blei ha ki Pulit.
U President ka seng u samla Ribok Diengdoh ha u kyrwoh video ba la phah sha ki lad pathai khubor ha ka sngi Baar u la ong, “lashai ka sngi (Balang) hapoh 12 baje mynsngi ngan poi hapoh Sohra Police Station. Ki dkhot kiba shynrang mynsiem ki dei ban mih. Ki kmie ki kpa kiba sngewthuh ia ka jingshah nioñ beiñ ha kum kine ki jait briew ki dei ban mih nangne shakhmat.
Lada phi lah ban pynthikna ba nga dei uba donkti bad u nongpyniap briew, pynthikna lashai ka sngi. Phi dei ban pynthikna. Nga, nga dei u khun dap shynrang i mei bad ym shym la kha bad i mei im shym la sneng ia nga khie ma me ynda la heh la san khie leit pyniap briew,” la ong une u nongialam ka seng.
“Kum u nongialam, nga dap da ka jingsngewkhia namar kaei kane kaba ngi, ngim sngewthuh shuh. Haoid ngi sngewthuh ba kane ka jingpynlong sohpdung jong ki Pulit ka dei beit ka jingjia ha Ichamati (Pynthaumdan). Ka jingong jong ki, ka dei kaba shu jler suda. Ka jingong jong ki ban shu shim jingkylli kam dei pat ba kin leit mynmiet myniong. Haei ju don ka aiñ ban leit kem mynmiet myniong ia ki briew. Kata nga kwah ban buh jingkylli,” la buh jingkylli shuh shuh une u nongialam ka KSU.
Haba pynrem ia ki Pulit, u samla Ribok u la ong, “ka rukom kem jong ki (Pulit) ka long thik kum ia u lehnoh (namarba) 1:30 baje mynstep ki shu leit kem na iing. Lada ym don briew ha ing, kin shoh kin bom bad kin ong ba u pynap da ka tari kumba pynap u Bah Cheris. (Hato ka) long hi kata?”
“Mar syn iohkem ia ki dkhot jong ngi arngut la pyllait ha ki lad pathai khubor katba ia kito ki briew ba la iohi pyllein pyllien da ka Video Clip ba ki shim ia ka mynsiem jong u Lurshai haduh mynta ngim ioh sngew ba kin pynpaw ia ka kyrteng ba katno ngut ki la kem. Ban shu kynnoh kam dei ka kam kaba suk, bad lada phi donkam khot ia ngi, ngi kloi ban wan shapoh Thanat,” u la ong.
“Naduh ka taiew ba ladep jong ka sngi Balang, sngi Palei, sngi Thohdieng, sngi Saitjain ka mobile phone jong ngi ka dang meh. Ha ka sngi Saitjain ngi dang don ha Sohra tad haduh ka lah Sngi u Blei ba ngi kiew Shillong. Hynrei balei ha kita ki lai sngi saw sngi phim lah ban phone ia ngi ban phah wan mih sha Thanat. Phi mut ban shu sylla ba ngi dei ma ngi kiba pyniap ia kita ki briew. bad nga lah ban ong ba lehse ioh dei ka kynja ishu ba ngi leit ban beh ia kito ki dkhar nongtrei jong ki Minister bad ban ong sa peit kaei ka ban jia phi mut ban leh da kumne. bad phi mut ban revenge bad buhnud buhnam ia ngi da kane ka rukom.
Lada phi kwah ban tohkit ia ki khynah, ai da ka kot, khot ia ki shapoh thanat nga ruj nga kloi ban wan,” la ong u samla Ribok.
“Ngim donkti ma ngi ha kata ka jingpyniap briew. Lada phi kwah ban kylli tohkit, kylli da kawei ka rukom, ym dei ban tan shiteng miet shiteng iong. Phi mut ba ki dei ki nongkyndong phin shu lehbeiñ ia ki ba kim tip ia ka ain. Hato ka ju don kata ka aiñ ban shu khot ia ki briew sha Thanat tang ban shim jingkylli kin da leit kem shi baje shiteng mynmiet ha ing,” la buh jingkylli une u nongialam ka KSU ia ka tnat Pulit.
“Wat khang, haduh ba ngan da poi ha Sohra Police Station bad ngin iakren kaei ka ban mih bad kaei ka ban jia,” u la bynrap.
“Lada phi mut ban shim jingkylli kumne kumtai kumno ka jia ha kato ka sngi, dei ban phah da ka kot bad phah wan mih ia ki (dkhot) shapoh thanat bad hynnin nga dang iohsngew ba ki (Pulit) ki leit hapoh 1:30 baje mynstep, ki wad ia nga, nga ngam dei ba nga tieng ba nga rieh hynrei nga beh la ka kam nga wan kiew sha shillong. Ngam shym la rieh bad nga pangmet haba ki khynah lajong kin shah kem. Nga dei u nongialam, nga sngewthuh ban iohi ba ki bahaing ki iam nga ruh nga pang ka mynsiem,” ong une u nongialam ka KSU.
“Ki khynnah jong ngi ki dang bun kiba dang pule kan jia aiu ia ki? Ka jingleit klas jong ki kam myntoi shuh lada phi pynngat Case. Ka kam ka jam kim ioh shuh. Mynta ngi, ngin pynthikna wat pynngat case ia kine ki khynnah katba phim pat pynthikna mano ba donkti ban pyniap ia kito ki briew da kaba shu tharai. Ban shu ong u briew ba dei kita ki dei kita phin shu ngeit noh phi hap ban wad jingtip haduh ban da lap. Phin da lap ia kita ki briew pynshitom katkum ka aiñ lada ki don kita ki briew kiba nud ban shim ia ka mynsiem briew. Ngin sa ia peitkai ha kaei ka kyndon phi pynngat ia ngi bad lada phi, phim don ia ka sakhi kaba biang ngin sa ia peit kai. Na ka liang jong ka seng ngi don la ka iktiar ba ngin leh na ka bynta jong phi kiba shu thombor,” ong shuh shuh u Samla Ribok Diengdoh.
Haba buh jingkylli ia ka tnat Pulit, u samla Ribok u la ong, “naduh ba iap u Lurshai Hynñiewta, saw snem kynthi ngi leit buh syntiew manla u snem kam ju don kano kano ka jingjia. Lada dei ma ngi kiba pyniap briew saw snem kynthih ngi la wan kam la jia kaei kaei ha kito ki sngi. Ngi tang shu dep ka kamram ngi la phet. Ngi kwah ia ki bor jong ka aiñ ba kin leh da kaba donkam ia ki briew kiba pyniap ia u Lurshai. Hynrei mynta phin shu kynnoh ba dei ma ngi? Sangeh noh ka kem naduh lashai ka sngi nga la wan shapoh Sohra bad wat kem ia ki dkhot jong ngi. Lada phi kwah kylli jingkylli, kylli na kita kiba don bad kiba ia leit.”
“Lada phi mut ban shim jingkylli kumne kumtai kumno ia ka jingjia ha kato ka sngi, dei ban phah da ka kot (hajir) bad phah wan mih ia ki shapoh Thanat bad hynnin nga dang iohsngew ba ki (Pulit) ki leit (kem) hapoh 1:30 baje mynstep. Ki wad ia nga, nga ngam dei ba nga tieng ba nga rieh hynrei nga beh la ka kam nga wan kiew sha shillong,” u la ong shuh shuh.
