Shillong, K’lyngkot, 06: U khñiang jingpang ba thymmai uba la mih na ka ri China ïa uba la tip kum u Human Metapneumovirus lane u HMPV mynta u la saphriang da kaba wan poi sha ka ri India.
Kane kan dei ka wat kaba ar kaba pynkynmaw biang ïa ki paidbah shaphang u khniang jingpang Corona Virus uba la sar ïa ka pyrthei baroh kawei ha u snem 2020 bad 2021 ha kaba ki paidbah kiba la ngat ha une u khniang jingpang ki la mad ïa ka jingshitom kaba jur bad don ruh kiba la khladnoh na kane ka sla pyrthei da kaba iehnoh shadien ïa la ki jong ki baieid bathoiñ.
Ka kynhun lum khubor jong ka Batesi, ha ka 6 tarik Kyllalyngkot, 2025 ka leit swait kylleng ki jaka paidbah ha kaba la sakhi ba ki paidbah kim pat i patiaw eiei shaphang une u Human Metapneumovirus ne ïoh lehse ki ap haduh ba ka tnat ka Koit ka Khiah jong ka Sorkar Jylla kan da pynmih ïa ka hukum kumba la jia ha ki snem ba ladep ba ka khlam jingpang Covid-19 ka la wan lynshop.
Ka kynhun lum khubor la leit jurip ruh ïa ki jaka ai jingsumar kiba don ha kylleng ka nongbah Shillong, hynrei la ïohi ba ki briew kiba rung ba mih ha ki hospital ki duna haduh katta katta ki paidbah kiba pyndonkam ban deng ïa ka Mask khnang ban ïada ïalade na kaba ïabit jingpang.
Ka tnat ka koit ka khiah jong ka Sorkar India mynta ka la peitngor bha ïa ka jinglong jingman hadien ba Indian Council of Medical Research (ICMR) ka la lap ba ki la don ar ngut ki khyllung kiba la ïoh ïa kane ka jingpang ha ka jylla Karnataka kiba la don mynta hapdeng ka jingshah sumar.
Hato ngin ap tad haduh ba ka Sorkar kan da pynmih ïa ka jingbthah lane ngin phikir hi lade? Ka rai ka shong ha ki kti jong phi ki paidbah kumno ban sumar ïalade shimet shimet.
