Shillong, Nailur, 04: U Myntri Rangbah ka Meghalaya u Conrad K. Sangma bad u Myntri Rangbah ka Assam u Himanta Biswa Sarma ki lah ban bteng biang ha u bnai Risaw ia ka wat kaba ar na ka bynta ka jingiapynbeit ia ki hynriew tylli ki jaka kiba dang don hapdeng ka jingiakajia pud.
Ha ka jingiakren bad ki lad pathai khubor ha ka sngi Balang u Sangma u la iathuh ba u la pynsngew ia kane ka kam ha u Myntri Rangbah ka Assam ha ka jingiabam jamiet lai taiew mynshwa.
“Baroh arngut ngi la rai ba la kumno kumno ngin bteng biang ia ka jingialang pynbeit pud ha u bnai Risaw,” la ong u Sangma.
Haba pynpaw ba ka wat ia pynbeit pud kaba ar ka dei kaba kham jwat u Myntri Rangbah u la ong, “namarkata, ngi hap ban da phikir bha katba ngi dang iaid shakhmat ban iakren pynbeit ia ki jaka kum ka Langpih, Psiar, Khanduli, Block I bad II, namarba ngi sgnewthuh ba ki don bun ki jyrwit jyrwat. Kim long kiba suk kum ha ka wat kaba nyngkong.”
“Namarkata, watla ka jingangnud bad ka jingthmu jong ngi ka long kaba skhem kumba mynshuwa hynrei namar ka jinglong jingman bad ki jaka, ngi kwah shisha ban husiar katba ngi nang ïaid shakhmat khnang ba ngin lah ban pynbeit ïa ka ha ka rukom kaba dei bad ha ka rukom ha kaba ngi lah ban wanrah ïa ka jingïasngewthuh jingmut na baroh lang,” u la bynrap.
Ka bynta ba nyngkong jong ka jingiakren pynbeit pud ha ka wat kaba ar hapdeng ka jylla Meghalaya bad Assam ka la long ha ka 23tarik, Jymmang, 2023.
Ki 6 tylli ki jaka ba don ha ka jingiakajia pud ki kynthup ia ka Langpih, Borduar, Nongwah-Mawtamur, Deshdoomreah, Block-I & Block-II, bad ka Khanduli-Psiar.
