Shillong, Naitung, 22: Ki don ki jingjia ba la pyntip ba ki don ki nongñiah thuk thuk kiba ju mlien ban pynkheiñ ïa ka kyndon ïaid kali da kaba ïaid be-aiñ na ki surok ‘One Way’ kaba buh jingma kaba khraw ïa kiwei pat ki nongïaid lynti kiba pyndonkam ïa ka surok.
U kyrwoh ba la phah da u Superintendent of Police ka East Khasi Hills District u Bah Sylvester Nongtnger ha ka Lah Sngi u Blei, u la ong, ha kaba ïadei bad ka jingïaid jong ki kali ar shaka, la lap ba bunsien ki thuk thuk ar shaka ki ïaid na ka liang ka diang bad ka buh jingma ïa kiwei pat ki nongleit nongwan khamtam eh ïa ki nongshong kali kiba hiar na ki kali kaba lah ban lam sha ka jingjia aksiden kaba pynïap briew.
Halor kine ki jingjia, ka Shillong Traffic Police (STP) ka kyrpad ïa baroh ban bud ryntih ïa ki kyndon pynïaid kali haba don ha surok bad ban bat ruh ïa ka akor niah kali.
“Kiba pynkheiñ ïa ka aiñ kin shah pynshitom katkum ki kyndon aiñ,” la ong u SP.
Ha kajuh ka por, u SP u la pyntip ba ki don ki thuk thuk ar shaka bad ki kali saw shaka kiba la teh da ki ktang pait kiba pynmih ïa ka jingsawa kaba jam haba ïaid ha sor khamtam ha ka por shiteng synnia kaba pynthud ïa ka thiah ka dem jong ki riewtymmen, ïa kiba don jingshitom, ïa ki khynnah bad ïa ki briew kiba donkam ïa ka jingkynjah.
Nalor kata, wat hadien ba ladep ban kyrpad na ka por sha ka por la ïohi ba ka don ka jingtah ïa ki phlim rong ïong, pyndait flash light bad teh siren ha ki kali kaba long kum ka jingpynkheiñ ïa ki kyndon ñiah kali.
Ha kaba ïadei bad kane, la kyntu ïa ki nongniah kali ba kin kiar na ki jingpynkheiñ aiñ katkum ba la kdew haneng khnang ban pynthikna ïa ka jingshngaiñ ha surok bad ka jingshngaiñ jong ki nongshong shnong ka nongbah Shillong bad kiwei kiwei kiba wan jngoh ïa ka nongbah.
“Ïa kiba pynkheiñ yn pynshitom katkum ka kyndon jong ka aiñ,” la maham u SP.
