Shillong, Nailur, 07: Da ka jingthmu ban wahrah ïa ka jingkhuid ka jingsuba bad kumjuh ruh ban pynneh pynsah ïa ki tyllong umbam umdih, ki lai tylli ki shnong ki la mana tyngeh ïa kino kino ki briew ban dang sait kali ha Wah Umiew kaba long ka tyllong um jong ki lai tylli ki shnong kiba don ha ka thaiñ Smit East Khasi Hills District.
Ha ka 10 tarik, Jymmang, 2024 u Deputy Commissioner barim ka East Khasi Hills District u SC Sadhu u la pynjari da ka Section 144 CrPC ban mana ïa ki briew ba kim dei shuh ban dang sait kali ha wah Umiew ha ka bynta jong ka shnong Umiew Maw-u-Sam, Smit, East Khasi Hills District.
Ki lai tylli ki shnong ba ki paidbah nongshong shnong ki ju pyndonkam ïa ka um ha Wah Umiew ki kynthup ïa ka shnong Maw-u- Sam, Mawkateiñ bad ka Umiew Maw-u-Sam.
Ka jingkwah jong kine ki lai shnong ban pynjari da ka kyndon 144 CrPC ka long ban wanrah ïa ka jingshngaiñ ruh ha ka leit ka wan jong ki riewkynthei bad kumjuh ruh ki khynnah namar ka jingdon jong ki jaka sait kali ïa kiba ka shnong ka kwah ban khang noh, nalor ka jingdie kiad be-aiñ bad kiwei de ki kam kiba i saitmet.
Kaba kongsan eh ba kine ki shnong ki kwah ka long ban pynneh pynsah ïa ka tyllong um jong ka Wah Umiew.
U Ophisar ba mikhmat na ka Madanriting Police Station haba ai jingkren ha ka jingïalang ba la long ha ka sngi Saitjaiñu la pynshai halor ka kyndon 144 CrPC bad ong hadien ba la pynjari ïa kane ka kyndon yn ym shah shuh ïa ki briew ban ïalum paidbah bad leh kino kino ki kam sniew kam smeh hapoh u pud u sam jong kine ki shnong bad lada lap ki Pulit kin kem beit bad yn set phatok kumba hynriew bnai ryngkat ka jingdaiñ kuna.
Ha kane step, la sakhi lang da u Rangbah Shnong jong ka Mawkynteiñ u Bah Dishal Sing Kurkalang, u Rangbah Shnong Maw-u-Sam u Bah Herbel Kshiar, u Rangbah Shnong ka Umiew Maw-u-Sam u Bah Banteiskhem Kshiar bad u Block Development Officer (BDO) ka Mawryngkneng C&RD Blcok u Dr. Damuthimi Lyngdoh, ki Pulit na Madanrting Police Station bad ki nongshong shnong jong ki lai tylli ki Dorbar Shnong.
