Shillong, K’lyngkot, 04: Ka Miss Tourism India, Irene Dkhar kan mihkhmat ïa ka ri India ha ka lympung Miss Tourism World 2025 Global Finals, ka ban long ha ka 10 tarik mynta u Kyllalyngkot, 2025 ha Guangdong, China.
Ka Irene ka la mih na Delhi naduh 27 tarik u Nohprah ba la dep ban don lang bad kiwei kiba ïakhun kiba mihkhmat na 60 tylli ki ri ba kynthup na United States, France, Brazil, Venezuela, ryngkat ki dkhot jong ka Belt and Road Initiative bad ka Shanghai Cooperation Organization.
Ka nam Miss Tourism World ka dei kaba la ithuh na ka bynta ban kyntiew ïa ka kam jngohkai bad ka riti dustur jong ka ri kaba pynlong ïa kane ka lympung kumjuh ruh jong ki ri ba leit ïashim bynta.
Kane ka lympung ka la ïoh ruh ïa ka jingkyrshan na u Ahmed Mustafa Fahmi, uba dei u Ambassador ka Arab League Ambassador sha China; u Sinisha Belyan, Ambassador ka Bosnia bad Herzegovina sha China; bad u Ivan Chiulu, Ambassador ka Zambia sha China.
Ka jingïaid lynti jong ka Irene Dkhar ban poi sha ka lympung ba heh jong ka pyrthei sngewtynnat, ha kaba shwa ba kan ïoh ïa ka nam kum ka Miss Tourism India 2024, ka la ïoh khur ruh bun ki jingjop ha ki lympung thei bhabriew, ba kynthup ïa ka pansngiat Miss Meghalaya 2022, Miss Northeast 2022, ka la mihkhmat ruh kum ka Femina Miss India Meghalaya 2023 bad Miss Grand India Meghalaya 2024.
Na ka liang ka Miss Meghalaya Organization ka la kitbok ïa kane ka samla, da kaba pynpaw ruh ka jingkyrmen ba kan wanrah ïa ka pansngiat jingjop sha ri India.
