Shillong, Jymmang, 29: Ka Committee on Government Assurances jong ka Meghalaya Legislative Assembly, ba la lamkhmat da u Chairman Bah Renikton Lyngdoh Tongkhar, ryngkat bad ki dkhot ba kynthup ia ki arngut ki MLA, Bah Gabriel Wahlang bad u Bah Matthew B Kurbah, ha ka sngi balang ki la leit ban jurip ia ka karkhana Mawmluh Cherra Cements Limited (MCCL) ha ka shnong Mawmluh, Sohra.
Ki dkhot ka Committee ki la iakren ruh bad ki Ophisar jong kane ka karkhana ba la pyniaid da ka Sorkar, ia kaba ka Sorkar ka la rai kut ban khang khyrdep noh.
Ka Managing Director jong ka MCCL, Kong W.A.M. Booth, u Chief General Manager jong ka MCCL Bah K. Lyngdoh bad kiwei pat ki ophisar jong ka karkhana ki la iashim bynta lang ban pynsngew ia ki jingeh jong ka karkhana hakhmat ki dkhot ka Committee.
Ha ka jingialang, u Chairman jong ka Committee ula pynpaw ba kam don shuh ka jingkyrmen ia ka karkhana ban dang pynim biang sa shisien na kiba bun ki daw, kynthup ruh ka jinglut kaba jur ban pyniaid ia ka karkhana.
Ki dkhot ka Committee da kawei ka sur ki la mynjur ban phah ia ka jingai jingmut sha ka Sorkar ban pynkylla ia kane ka karkhana kum ka Museum bad ia ki jaka sah jong ki nongtrei ka MCCL kum ka Resort, khnang ban plie lad ia ki nongtrei ba kin pyniaid ia ka Resort bad ia ka Mesuem. U la bynrap, da kaba pynkylla ka phyllaw sha ka jaka jngohkai pyrthei, yn sa lah ban lum ia ka khajna.
“Ngi tip ba ka sorkar ka kwah ban pynduh noh ia kane ka karkhana bad ban khangdam bad ban pynpra..hadien ba la peit bniah ia ka jingitynnat jong kane ka jaka bad iohi ia ki jaka sah bad ki ing jong ka MCCL, nga sngewsih ban pynpra ia ka,” la ong u Chairman.
U dkhot ka Committee Bah Matthew B. Kurbah u la iathuh ba u la don ka jingiadei bad ka MCCL naduh u snem 1999-2000 bad u la pynpaw ia ka jingsngewdiaw halor ka jingkhang khyrdep ia ka karkhana bad ia ka jingduhkam duhjam jong ki nongtrei. U la mynjur ia ka jingtyrwa jong u Chairman, da kaba ai jingmut ba ia ka khana pateng jong kane ka karkhana yn sa lah ban iasam sha ki paidbah lyngba ka jingpynkylla sha ka Museum, bad ba ki nongtrei kin dup lah ban pyniaid biang sa shisien ia ki kam hapoh kane ka karkhana.
Haba pynpaw ia ka jingsngewsih halor ka jingkhang khyrdep ia ka karkhana u dkhot ka Committee Bah Gabriel Wahlang u la pynpaw ia ka jingkyrmen ba ka Sorkar kan sas lah ban pynkhreh ia ka song jingiarap ka ban sa pynmyntoi na ka bynta ki nongtrei jong ka MCCL.
