Shillong, Jymmang, 29: Arngut ki snar khaii drok kiba la tip kyrteng kum u Sumit Kumar Sinha, uba la 39 snem ka rta na ka shnong New Majai, Bholaganj, East Khasi Hills bad u Rabindra Deka, uba la 27 snem ka rta na ka shnong Khatarobori, Bhurbandha, Marigaon, Assam ki la shah kem ha ki Pulit jong ka Anti Narcotic Task Force ka East Jaiñtia Hills District katba ki dang wan na ka jylla Assam ban leit sha Shillong.
Ki Pulit ki la ïathuh hadien ba ki la ïoh ïa ka jingtip kaba bniah bha ki la pynlong ïa ka jingpynap shrip bad ki Pulit ka Traffic Branch jong ka Khliehriat Police Station ha ka miet sngi Baar ha Khliehriat bad dei ha ka por kumba 1: 00 baje mynstep sngi Balang ki la ïoh bat ïa kawei ka kali bad ha ka jingkhynra ki Pulit ki la lap ïa ki dawai Yeba Tablets kiba khia 191.88 gram.
Ki Pulit ki la Register Case pyrshah ïa kine ki ar ngut ki briew hapoh ki kyndon jong ka aiñ NDPS Act bad ka jingtohkit mynta ka la ïaid shakhmat.
