Shillong, K’Lyngkot, 09: U Myntri ka Sorkar Jylla Bah Shakliar Warjri ha ka sngi Baar u la kaweh ia ka lama kum ka dak jong ka jingsdang ia ka jingrah ia ka Dongmusa na kawei ka District sha kawei pat tad haduh ban da pynpoi ha ka lympung ialehkai 5th Meghalaya Games 2024 ka ban sa long naduh ka 15 tarik haduh 20 tarik mynta u bnai ha Tura, West Garo Hills District.
U Bah Shakliar ula aiti ia ka Dongmusa ha madan SSA Stadium hapdeng ka jingiadon ryngkat jong ki nongkitkam ka Meghalaya State Olympic Association (MSOA), ki Ophisar ka tnad Sports and Youth Affaris lem bad ki nongialehkai na ki district bapher bapher.
Ia kane ka Dongmusa la aiti ban rah da u rangmareh ba pawnam ka Jylla Bah Binningstar Lyngkhoi uba la ioh khur bun tylli ki takma na ki lympung iakhun ha Jylla, ha ri India bad shabar ri ruh kumjuh. U Bah Benningstar un pynpoi ia kane ka Dongmusa jong ka lympung ialehkai sha ka madan ialehkai ha Tura.
Ia kane ka lympung yn sa plie paidbah da President ka ri India ka Droupadi Murmu ka ban sa long kum ka Kongsan.
Haba kren kum u Kongsan, u Bah Shakliar Warjri u la pynpaw ia ka jingsngewkmen ba la sdang ia ka lympung ialehkai Meghalaya Games da kaba thang ia ka sharai bad ba la aiti sha ki nongpyniaid. U la ong ba ka Meghalaya Games ka dei kawei na ki lympung ialehkai sports kaba heh ha ka jylla bad ha kajuh ka por u la ai khublei ia ki nongialehkai ki ban sa iashim bynta ha kane ka lympung.
