Shillong, K’lyngkot, 08: Ka Nongaiktien jong ka Sorkar Jylla ka Dr. Ampareen Lyngdoh kaba long ka Myntri Sorkar ha ka Lah Sngi u Blei ka la ong ba ka Sorkar Jylla kam dei hok ban tuklar ïa ka jingtreikam ba laitluid jong ka Lokayukta.
“Ïa kane ka jingsngewthuh bakla dei ban pynbeit noh mardor,” la ong ka Dr. Ampareen ha ka jingïakren bad ki lad pathai khubor haba pynphai nia halor ka jingkynnoh jong ka Voice of the People Party (VPP) ha kaba ïadei bad ka jingweng noh ïa u Director of Inquiry bad ki Inquiry Officer jong ka Meghalaya Lokayukta.
Kane ka jingpynshai, ka long halor ka jingkynnoh ba la wanrah da ka Liang Pyrshah Voice of the People’s Party (VPP) ha kaba ïadei bad ka jingwengkam ïa ki Ophisar na ka Meghalaya Lokayukta, halor ka jingkam ba ki dei kiba la lap ïa ka jyrsieh bamsap hapoh ka Garo Hills Autonomous District Council (GHADC).
Ki ophisar ba la shah wengkam ki kynthup ïa u Director of Inquiry and Prosecution Bah J. Rymmai, uba long u Ophisar IPS barim, ryngkat bad u Enquiry-cum-Investigating Officers Bah R. Pde bad u Anil K. Sangma.
Ka la ong, katkum ka Lokayukta Act, 2014, Sorkar ka la ïoh ïa ki jingdkhoh ha kaba jied ïa ki dkhot, kiba la thung ha ka Lokayukta ba kynthup ha ka post Director of Inquiry bad u Director Prosecution.
“Haba ngi ïohi ïa kine ki jingbakla, ka Sorkar ka la shim da ka sienjam ban pynbeit noh ïa ki jingbakla katkum ba la kdew ha ka Aiñ, ka Sorkar ka la ai jingmut sha ka Lokayukta, kaba la pynkupbor ban thung ïa la ki jong ki dkhot. Ïa ka kyrteng la phah sha ka Meghalaya Lokayukta bad mar mar la pynbeit ïa ki jingbakla bad jied ruh ïa ki ophisar,” ka la ong.
“Ka dei ka jingkwah jong kane ka Sorkar ban ai ka jingkular sha ki nongshong shnong ba ngin ym tuklar ïa kino kino ki kynhun treikam bad ïa ki jingtreikam jong ki bad ngi kular ruh sha ki paidbah jong ka Jylla Meghalaya ba kino kino ki jingbakla ngin ïaleh ban pynbeit bad ma ngi kum ka Sorkar ngi la pyntyllun shakhmat ïa ka jingtreikam katkum ka aiñ bad katkum ka jingai jingmynjur ïa ki nongrim jong ka Meghalaya Lokayukta Act 2014,” ka la bynrap.
U nongaiktien jong ka National People’s Party’s (NPP) Bah Himalaya M. Shangpliang uba long ruh u Adviser jong ka tnat Pule Puthi ka Sorkar Jylla u la pynshai ba katkum ka Section 10 (2) bad 11 jong ka Meghalaya Lokayukta Act, 2014, ki ophisar lane ki nongtrei ki dei ban long kiba dang shakri ha ki tnat treikam jong ka Sorkar. Ki nongtrei ba la shongthait kim lah shuh ban dang long ki nongtrei jong ka tnat. Ka Sorkar ka burom ka Meghalaya Lokayukta Act.
U la pynshai ba ka lynti ban thung ïa kine ki ophisar ka katkum ka Lokayukta Act, 2014 hapoh ka Section 10 (2) kaba ong, “dei ban don u Director of Inquiry bad Director of Prosecution kiba ka kyrdan kam dei ban kham poh ïa ka kyrdan u Additional Secretary jong ka Sorkar Jylla lane kaba ryngkat bad kata, ïa kiba yn thung da u Chairperson da kaba jied na ka thup kyrtengba la phah da ka Sorkar Jylla.”
“Katkum ka Section 11 jong ka Meghalaya Lokayukta Act, 2014 ka ong ruh, “watla kano kano kaba ïadei bad ka aiñ kaba la pyntreikam, ka Lokayukta kan thung ïa ka Inquiry Wing ban khlieh da u Director of Inquiry na ka bynta ka jingthmu ban pynlong ïa ka jingtohkit halor kino kino ki jingkynnnoh ba la leh da kino kino ki shakri sorkar kiba lah ban shah pynshitom hapoh ka Prevention of Corruption Act, 1988.
Naduh ka por ba la thung ïa ka Inquiry Wing da ka Lokayukta, ka Sorkar Jylla ka la phah ïa ki kyrteng jong ka ophisar bad ïa kiwei kiwei ki nongtrei na ka tnat, katkum ka jingdonkam jong ka Lokayukta, na ka bynta ban pynlong ïa ki jingtohkit hapoh kane ka Aiñ.
Na ka bynta ban ai jingïarap ïa ka Lokayukta ha kaba pynlong ïa ka jingtohkit, ki ophisar jong ka Inquiry Wing kim dei ban long kiba rit ïa ka kyrdan jong u Under Secretary jong ka Sorkar, hynrei ki dei ban don ïa kajuh ka iktiar katkum ba la pynkupbor hapoh ka Lokayukta hapoh ka Section 88.
U Bah Shangpliang u la ong ba ki Ophisar ba la weng na ka ophis jong ka Lokayukta ki dei kiba la shongthait ïa kiba la shim na ka tnat Pulit.
“Ka dei tang ka kam ba shipor na ka liang jong ka Sorkar khnang ban dup lah ban pyntyllun ïa ka jingtreikam jong ka Lokayukta bad ïa ka jingthungkam la pynmih na ka bynta u Director of Inquiry ha u Risaw, 2022 bad na ka bynta ki Inquiry Officers la pynmih ha u Lber, 2023. Ka Sorkar ka sngewdei ba ka ophis Lokayukta ka dei ban don ïa ki ophisar kiba la tbit katkum ka Aiñ bad namarkata, katkum ka Section 10 bad 11 jong ka Aiñ ïa ka thup kyrteng la phah sha ka Lokayukta bad ka Lokayukta ka ladep jied bad pynmih ruh ïa ka jingpyntip halor ka shithi thungkam,” u la ong.
Ha ka 19 tarik Nohprah, 2023, ka ophis Meghalaya Lokayukta ka la jied ïa u ophisar IAS IW Ingty kum u Director of Inquiry bad lai ngut ki ophisar MPS kum ki dkhot ba kynthup ïa u Challang G. Momin, u John Clitzer A. Sangma bad u Banïateilang Diengngan.
“Kane ka mut ba ka ophis Lokayukta ka la treikam pura da ka jingthung ïa ki opphisar bapura ïa kiba la shim na kiba dang don hapdeng ka jingshakri hapoh ka Sorkar Jylla,” la ong u Bah Shangpliang.
“Kam pat ju don kano kano ka por ba u Myntri Rangbah ne ka Sorkar ka la tuklar halor ka jingthungkam ne ban jied ïa ki ophisar ban phah sha ka Lokayukta lymne u Myntri Rangbah bad ka ophis jong u kin tuklar ïa kino kino ki case kiba ka Lokayukta ka la shimti.”
